Elbasan, 28 nëntor 2025 – Në prag të festave të 28–29 nëntorit, një vogëlushe nga Elbasani ka prekur zemrat e publikut me talentin, energjinë dhe ndjenjat e saj të pastra artistike. Belisa Ademi, vetëm 9 vjeçe, ka surprizuar mijëra shikues me këngën e saj të re “Gëzuar Shqipëri”, një projekt i mbushur me motive patriotike dhe simbolikë që i jep një emocion të veçantë këtyre ditëve të shënuara për shqiptarët.
Nxënëse e klasës së tretë në shkollën “Qamil Guranjaku”, Belisa ka prej vitesh një pasion të madh për muzikën. Kënga “Gëzuar Shqipëri”, e publikuar në YouTube, po ndiqet me interes të jashtëzakonshëm dhe ka tërhequr vëmendjen e mijëra shikuesve në pak kohë.
Ky projekt, që i kushtohet nënës Shqipëri, vjen me vargje të ndjera dhe ritme energjike që sjellin atmosferën e festave kombëtare. Në klip, koreografia e realizuar me ngjyrat kuqezi pasqyron krenarinë dhe traditën shqiptare, duke i dhënë këngës edhe më shumë forcë emocionale.
Realizimi i kësaj kënge ka kërkuar shumë punë profesionale: nga teksti dhe muzika, te orkestrimi, koreografia dhe videoproduksioni. Belisa e ka përballuar projektin me një seriozitet të admirueshëm për moshën e saj, duke treguar talent, përkushtim dhe disiplinë artistike.
Reagimet pozitive nuk kanë munguar: shokët dhe shoqet e përgëzojnë, mësuesit shprehen krenarë, ndërsa banorët e Elbasanit e shohin Belisën si një yll të vogël që vjen me premtime të mëdha për të ardhmen. Ajo po admirohet gjerësisht për energjinë, zërin dhe prezencën e saj skenike.
Ekipi realizues:
Artist: Belisa Ademi
Music & Production: Vullkani Records
Lyrics: LOCO
Choreography: Art Revolution Dance
Video: Besnik Ademi
Support: Kostume popullore Zhani, Kriva Palce
Me interpretimin e saj të jashtëzakonshëm dhe mesazhin e fuqishëm të këngës “Gëzuar Shqipëri”, Belisa Ademi sjell një atmosferë krenarie dhe gëzimi për çdo shqiptar.
