Elbasan, 27 janar 2026
Pasditen e së hënës u zhvillua procesi zgjedhor për organet drejtuese të Dhomës Vendore të Avokatisë Elbasan, në zbatim të vendimit të Këshillit të Përgjithshëm të Dhomës së Avokatisë së Shqipërisë, i cili kishte miratuar kalendarin dhe rregulloren për zgjedhjet në të gjitha dhomat vendore të vendit.
Procesi përfshinte zgjedhjen e kryetarit të Dhomës Vendore, sekretarit, një anëtari të Komitetit Drejtues, si dhe përfaqësuesve të Elbasanit në Këshillin e Përgjithshëm të Dhomës së Avokatisë së Shqipërisë. Në garë për postin e kryetarit morën pjesë katër kandidatë: Demir Çiftja, Ledian Muzhaqi, Erind Gjeta dhe Aldi Kaci.
Nga 84 anëtarë të regjistruar, në votim morën pjesë 68 avokatë. Pas numërimit të votave, kryetar i ri i Dhomës Vendore të Avokatisë Elbasan u shpall juristi Erind Gjeta, i cili mori 21 vota. Ai u pasua nga Ledian Muzhaqi me 19 vota, Demir Çiftja me 16 vota dhe Aldi Kaci me 12 vota.
Përfaqësues të Dhomës Vendore të Avokatisë Elbasan në Këshillin e Përgjithshëm të Dhomës së Avokatisë së Shqipërisë u zgjodhën avokatët Elis Kovaçi dhe Aldi Kaci, ndërsa anëtarë të kryesisë së Dhomës Vendore u zgjodhën Shkëlqim Duka dhe Anton Prekaj.
Profili i Kryetarit të ri
Erind Gjeta, i lindur më 2 nëntor 1988, ka përfunduar studimet e larta në Fakultetin Juridik të Universitetit të Bolonjës, ku u diplomua në vitin akademik 2012–2013. Formimi i tij akademik përfshin fusha të ndryshme të së drejtës, si e drejta publike dhe private, tregtare, fiskale, penale, administrative, e sigurimeve private dhe e transportit.
Temën e diplomës e ka mbrojtur në lëndën e së Drejtës së Transportit, me titull “Disiplina e sektorit të shërbimeve ajrore në kuadrin legjislativ ndërkombëtar dhe komunitar”. Arsimin e mesëm e ka përfunduar në gjimnazin “Dhaskal Todri” në Elbasan, ndërsa profili i tij profesional është pasuruar edhe nga përvoja si përkthyes juridik.
Vizioni dhe prioritetet
Në fjalën e tij pas shpalljes së rezultatit, Erind Gjeta theksoi se mandati i tij do të mbështetet në transparencë, profesionalizëm dhe forcimin e rolit të avokatit në sistemin e drejtësisë. Ai renditi si prioritete forcimin e bashkëpunimit brenda trupës së avokatëve, rritjen e rolit institucional të Dhomës Vendore të Avokatisë Elbasan, mbrojtjen e interesave profesionale dhe dinjitetit të avokatëve, si dhe përmirësimin e cilësisë së shërbimit ligjor përmes trajnimeve dhe bashkëpunimeve akademike e institucionale.
Gjithashtu, kryetari i ri vuri theksin te digjitalizimi i shërbimeve, mbështetja e avokatëve të rinj përmes mentorimit dhe rritja e transparencës financiare dhe vendimmarrëse. Sipas tij, synimi është që Dhoma Vendore e Avokatisë Elbasan të funksionojë si një institucion aktiv, përfaqësues dhe në përputhje me standardet më të mira europiane të profesionit ligjor.
