Pas përjashtimit nga Partia Demokratike, dega Elbasan, Doris Madhi ka reaguar publikisht, duke kundërshtuar akuzat dhe duke paralajmëruar për zhvillime të mëtejshme.
Në një postim në rrjetet sociale, Madhi ka deklaruar se vendimi për përjashtimin e saj e ka rikthyer në angazhim politik, ndonëse kishte menduar të tërhiqej.
Ajo mohoi të ketë mbështetur subjekte të tjera politike në kundërshtim me PD-në, duke theksuar se postimet e saj kanë qenë publike dhe në mbështetje të kandidatëve demokratë dhe miqve të saj.
Në reagimin e saj, Madhi hodhi akuza të forta ndaj drejtuesve lokalë të PD-së, duke pretenduar lidhje të tyre me elementë kriminalë dhe interesa personale, ndërsa shtoi se nuk do të mbështeste kurrë persona të tillë.
Gjithashtu, ajo bëri deklarata lidhur me procesin e numërimit të votave në Prrenjas, duke pretenduar se ka kontribuar në evidentimin e parregullsive, përfshirë raste ku, sipas saj, rezultati i votimit nuk përputhej me procesverbalet.
Madhi ngriti pikëpyetje edhe për rolin e përfaqësuesve të tjerë politikë gjatë procesit zgjedhor, duke kërkuar sqarime për situata që, sipas saj, mbeten të paqarta.
Në fund të reagimit, ajo paralajmëroi se do të vijojë me publikimin e qëndrimeve të tjera dhe se zhvillimet politike në këtë zonë do të shoqërohen me “surpriza”, duke shtuar se mandati aktual i drejtuesve të PD-së do të jetë i fundit për ta.
