Një valë humori ka përfshirë rrjetet sociale pas publikimit të një fotografie zyrtare të Diellës, ministres virtuale të krijuar nga Kryeministria.
Në imazhin futurist, Diella paraqitet elegante, e veshur në rozë (në kuadër të muajit të ndërgjegjësimit për luftën ndaj kancerit të gjirit). Por detaji që ka tërhequr vëmendjen është fakti se në dorën e djathtë ajo duket se ka… 6 gishta.
Reagimet në rrjet nuk kanë munguar. Një komentues ironizoi: “Diella ka 6 gishta?! Në fund të mandatit do ketë 60 tendera më shumë se çdo ministër tjetër!”
Ekspertët e inteligjencës artificiale, ndërkohë, e shpjegojnë fenomenin si një gabim tipik të modeleve gjenerative të imazheve: “Ndonjëherë, në përpjekje për të dukur më ‘njerëzore se njerëzit’, IA e tepron me detajet. Thjesht s’e ka ndalur njeri në kohë.”
Burime jozyrtare kanë shtuar me humor se në versionin e ardhshëm Diella do të ketë dy trupa, për të qenë njëkohësisht në dy ministri.
