Belsh, 31 Mars 2026 – Partia Demokratike në Belsh ka përmbyllur me sukses procesin e zgjedhjeve të brendshme, duke konfirmuar Bedri Qypin me 307 vota në krye të degës lokale. Qypi e cilësoi këtë proces si një moment të rëndësishëm që pasqyron vlerat demokratike dhe frymën e bashkëpunimit brenda strukturave të partisë.
Ai falënderoi anëtarët për pjesëmarrjen dhe seriozitetin gjatë procesit, duke theksuar se kontributi i tyre ishte kyç për një garë të rregullt dhe përfaqësuese. Një vlerësim të veçantë Qypi rezervoi për rivalin e tij, Roland Bullari, i cili mori 163 vota, duke e përshkruar garën si korrekte dhe qytetare.
“Këto zgjedhje nuk na ndajnë, por na bashkojnë më shumë se kurrë. Sot dalim më të fortë dhe më të vendosur për të vijuar rrugëtimin tonë politik,” u shpreh Qypi, duke shtuar se objektivi kryesor është një fitore e qartë në zgjedhjet e ardhshme. Ai nënvizoi se uniteti dhe besimi janë çelësi për të përballuar sfidat që presin Partinë Demokratike, duke apeluar për bashkim të energjive në funksion të forcimit të degës së Belshit.
I lindur më 7 shkurt 1969 në Belsh, Bedri Qypi ka përfunduar studimet në Universitetin “Aleksandër Xhuvani” në Elbasan në degën Financë-Kontabilitet. Karriera e tij politike filloi në vitet ’90, duke qenë themelues i seksionit të fshatit Hardhi (1992–2003), më pas kryetar i komunës Fierzë dhe anëtar i kryesisë së PD-së në Elbasan. Në vitin 2016, ai u zgjodh për herë të parë në krye të degës së PD-së në Belsh, dhe rizgjedhja e tij tregon besimin e strukturave ndaj eksperiencës dhe kontributit të tij gjatë viteve.
