Mundësia për një takim kokë më kokë mes Vladimir Putin dhe Volodymyr Zelensky duket më pranë se kurrë, pas takimit të Donald Trump me presidentin ukrainas dhe liderët evropianë.
Edhe pse takimi nuk është konfirmuar ende, kanë nisur diskutimet për qytetin që mund ta presë atë.
Presidenti i Francës, Emmanuel Macron, propozoi Gjenevën si vendtakim, duke argumentuar se një takim i tillë duhet të zhvillohet në “territor neutral”. “Unë, gjithsesi, mbështes Gjenevën,” tha Macron.
I njëjti qëndrim u shpreh nga ministri italian i Jashtëm, Antonio Tajani: “Gjeneva mund të jetë vendi më i përshtatshëm. Italia mbështet këtë zgjidhje.”
Sipas Sky News, edhe Rusia duket se preferon Gjenevën.
Megjithatë, Trump dhe Zelensky shfaqen më të prirur që takimi të mbahet në Romë. Sky News raporton se për Romën janë shprehur edhe sekretari amerikan i Shtetit, Marco Rubio, dhe nënkryetari i SHBA, J.D. Vance.
Diplomatë evropianë, të cituar nga mediat britanike, thonë se “ende po vlerësojmë disa vendndodhje të mundshme.”
Më herët, Reuters raportoi se një takim Putin-Zelensky mund të zhvillohej edhe në Hungari, duke u bazuar në informacion nga një zyrtar amerikan.
