ULQIN- ‘Ballkani i Hapur’ ka përfunduar zyrtarisht. Kështu tregoi sot kryeministri Edi Rama i cili foli nga Ulqini në një intervistë për ‘Euronews Albania’, aty ku tha se ‘Ballkani i Hapur’ e ka mbyllur misionin e saj.
Sipas Ramës, Ballkani i Hapur ishte një iniciativë që lindi nga nevoja për ta shtyrë përpara procesin e Berlinit. Ai shton se tani është koha që të merren me procesin e Berlinit, duke zbuluar se së shpejti do organizojë një tur në rajon për t’u takuar me liderët e vendeve.
“Në tetor Shqipëria pret për herë të parë që kur në 2014-tën Angela Merkel hapi procesin, Samitin e Berlinit në Ballkan, në Tiranë dhe është një samit jashtëzakonisht i rëndësishëm sepse ne jemi përgatitur për një hap të madh përpara, po punojmë me Bashkimin Europian për një plan të ri financimi dhe mbështetje ekonomike të gjithë vendeve të rajonit që duam shumë ta konkretizojmë në Samitin e Berlinit në tetor dhe është një plan real. Ursula Von der Leyen në Bratislavë e dha një mesazh të parë lidhur me planin për të rritur financimin, për të rritur aksesin e Ballkanit Perëndimor në tregun e përbashkët europian.
Ndërkohë që duhet të merremi me këtë, natyrisht që procesi i Berlinit është aksi ynë kryesor. Ballkani i Hapur ishte një iniciativë që lindi nga nevoja për ta shtyrë përpara procesin e Berlinit dhe e ka kryer atë mision për të cilin lindi. Ne duhet të futemi me kokë tani në procesin e Berlinit sepse e kemi këtë mundësi, e kemi procesin e Berlinit në Tiranë. Kemi mundësi ta zotërojmë si proces me mbështetjen e madhe që kemi nga Gjermani, nga kancelari Scholz dhe nga gjithë të tjerët dhe në ndërkohë e kuptoni se çfarë do të thotë? Tetori erdhi, korriku hyri, si mundet ne ta mbajmë të bashkuar Bashkimin Europian? Se jo të gjithë aty janë të vëmendshëm, jo të gjithë aty e kanë interesin që kanë këta kryesorët për të na mbështetur ne, për të mbështetur Ballkanin Perëndimor, nëse ne merremi me Oso Kukën. Si mundet ne? Kjo është arsyeja pse unë mendoj se procesi i Berlinit është e ardhmja jonë. Unë do bëj një tur në rajon për të takuar të gjithë kryeministrat dhe presidentët’.
Nuk dihet nëse mbyllja e nismës që u hap dhe u promovua me kaq entuziazëm nga kryeministri Edi Rama, të ketë lidhje me zhvillimet e fundit që po ndodhin mes Kosovës dhe Serbisë, e me marrëdhënien që ai ka tani me presidentin e Serbisë Aleksandër Vuçiç.
