Kryetari i Partisë Demokratike, Sali Berisha, e ka cilësuar procesin për zgjedhjen e kreut të PD-së si “votimin më të rëndësishëm dhe më të jashtëzakonshëm”, pas rikonfirmimit të tij në drejtimin e partisë.
Në fjalën e mbajtur pas përfundimit të procesit, Berisha falënderoi anëtarët e Partisë Demokratike për pjesëmarrjen dhe votëbesimin, duke e konsideruar rezultatin si një mbështetje të fortë për drejtimin e tij politik.
Ai shprehu mirënjohje edhe për demokratët që kanë votuar kundër ose kanë abstenuar, ndërsa premtoi se do të marrë në konsideratë çdo rezervë apo kritikë të shprehur gjatë procesit.
“Sot u vendos që të ecim të pamposhtur drejt qëllimeve tona madhore”, deklaroi Berisha para mbështetësve të tij.
Kreu demokrat e cilësoi pjesëmarrjen në votim si një tregues të forcës së Partisë Demokratike pas betejave politike të viteve të fundit, ndërsa paralajmëroi edhe kryeministrin Edi Rama, duke deklaruar se qeveria aktuale është “me zero legjitimitet”.
Berisha tha se procesi zgjedhor e ka nxjerrë PD-në “më të fortë se kurrë”, ndërsa shtoi se opozita do të vijojë betejën politike deri në ndryshimin e qeverisë.
