Një shpërthim i fuqishëm ka tronditur në orët e para të mëngjesit zonën e Bathores, ku një sasi e vogël lënde e dyshuar plasëse është vendosur dhe ka shpërthyer në portën e hyrjes së një banese. Ngjarja ka shkaktuar panik te banorët e zonës, ndërsa autoritetet policore kanë nisur menjëherë hetimet për zbardhjen e rrethanave dhe kapjen e autorëve.
Sipas njoftimit zyrtar të Policisë, ngjarja ka ndodhur më datë 12.09.2026, rreth orës 03:35, në rrugën “Rozafa” në Bathore. Lënda plasëse ishte vendosur në portën e banesës së shtetasit M. L., i identifikuar si Mariglen Lala, 36 vjeç. Si pasojë e shpërthimit janë regjistruar vetëm dëme materiale në derën e jashtme të shtëpisë, pa u raportuar për persona të lënduar.
Grupi hetimor ndodhet në vendin e ngjarjes dhe po vijon punën intensive për sigurimin e provave, identifikimin dhe kapjen e autorit ose autorëve të këtij sulmi. Ndërkohë, burime policore bëjnë me dije se 36-vjeçari Mariglen Lala rezulton të ketë qenë i arrestuar më parë nga strukturat e rendit për vepra penale në fushën e vjedhjeve dhe grabitjes së banesave e bizneseve, një fakt ky që po merret në konsideratë për të zbardhur motivin e mundshëm të këtij shpërthimi.
