Një apartament është përfshirë nga flakët pasditen e sotme në zonën e unazës jugore të qytetit të Elbasanit. Sipas të dhënave paraprake, dyshohet se shkak për zjarrin është bërë një bombol gazi, pasi një shpërthim i fuqishëm është dëgjuar vetëm pak çaste përpara se flakët të përpinin me shpejtësi ambientet e brendshme të banesës.
Në vendngjarje kanë mbërritur menjëherë shërbimet e Policisë së Shtetit dhe mjetet zjarrfikëse. Efektivët e ndërhyrjes emergjente kanë vepruar me shpejtësi për evakuimin e plotë të familjarëve të prekur dhe të banorëve të tjerë të pallatit, duke shmangur lëndimet në njerëz.
Falë ndërhyrjes së shpejtë të forcave zjarrfikëse, vatrja e zjarrit është vënë me sukses nën kontroll. Ndërkohë, grupi hetimor po vijon punën për verifikimin e shkaqeve të sakta të shpërthimit dhe vlerësimin e dëmeve materiale të shkaktuara.
