SHKODËR – Një ngjarje tronditëse ka ndodhur mesditën e sotme në qytetin e Shkodrës, ku një konflikt brenda familjes ka përfunduar me vrasjen e një gruaje nga bashkëshorti i saj.
Sipas të dhënave të para zyrtare, krimi i rëndë është regjistruar në afërsi të zonës së unazës perëndimore të qytetit të Shkodrës.
Sapo janë njoftuar për ngjarjen, shërbimet e Policisë së Shtetit kanë rrethuar zonën dhe kanë ndërhyrë me shpejtësi në skenën e krimit. Falë këtij reagimi të koordinuar, uniformat e blu kanë bërë të mundur kapjen dhe prangosjen në flagrancë të autorit të dyshuar të vrasjes.
Në vendngjarje ka mbërritur grupi hetimor dhe ekspertët e krimeve të rënda, të cilët nën drejtimin e Prokurorisë po punojnë intensivisht për mbledhjen e provave materiale, identifikimin e plotë të gjeneralitetit të viktimës dhe autorit, si dhe për zbardhjen e motiveve që çuan në këtë tragjedi familjare.
