Ka momente kur partneri është personi ynë i preferuar në botë dhe ka ditë kur edhe mënyra si merr frymë na duket bezdisëse. Nuk do të thotë domosdoshmërisht se dashuria ka mbaruar. Shpesh, rutina, puna, përgjegjësitë dhe stresi bëjnë që lidhja të kalojë në plan të dytë.
Pikërisht për këtë arsye, gjithnjë e më shumë çifte po i kthehen të ashtuquajturit rregulli 7-7-7, një formulë e thjeshtë që synon ta mbajë marrëdhënien të gjallë dhe të forcojë lidhjen me kalimin e kohës.
Ideja është e thjeshtë: ashtu si një bimë ka nevojë për ujë dhe kujdes për të lulëzuar, edhe një marrëdhënie ka nevojë për kohë cilësore dhe vëmendje të vazhdueshme.
Çfarë është rregulli 7-7-7?
Ky rregull bazohet në tre hapa të thjeshtë:
Çdo 7 ditë: Dilni në një takim vetëm ju të dy. Nuk ka rëndësi nëse është një darkë, një film, një shëtitje apo një kafe. Qëllimi është të shkëputeni nga rutina dhe të rikujtoni pse u dashuruat.
Çdo 7 javë: Organizoni një fundjavë larg. Një udhëtim i shkurtër ju ndihmon të ndryshoni ambient, të krijoni kujtime të reja dhe të flisni me qetësi për marrëdhënien, ndjenjat dhe gjithçka që mund të ketë mbetur pezull.
Çdo 7 muaj: Planifikoni një pushim më të gjatë vetëm si çift. Përveç relaksit, kjo është një mundësi për të forcuar intimitetin, për të krijuar eksperienca të reja dhe për t’i dhënë marrëdhënies një “rifreskim” të nevojshëm.
Fundja, rregulli 7-7-7 nuk është një formulë magjike, por një kujtesë se marrëdhëniet nuk funksionojnë me autopilot. Ato kërkojnë kohë, vëmendje dhe përpjekje të vetëdijshme.
Dhe ndoshta, mes gjithë angazhimeve të përditshme, pikërisht një takim çdo javë, një fundjavë çdo disa javë dhe një arratisje çdo disa muaj mund të jenë sekreti për ta mbajtur dashurinë po aq të fortë sa në ditët e para.
