Romë, 11 nëntor 2026 – Kryeministrja e Italisë, Giorgia Meloni, ka reaguar përmes një videomesazhi pas një vale kërcënimesh me bombë ndaj institucioneve arsimore, çka solli mbylljen e qindra shkollave në të gjithë vendin.
Kreu i qeverisë italiane u bëri thirrje qytetarëve për qetësi, duke sqaruar se këto alarme anonime nuk synojnë dëmtimin fizik, por nxitjen e panikut dhe destabilizimin e përditshmërisë. Meloni nënvizoi se autoritetet po punojnë për identifikimin e përgjegjësve dhe se përsëritja e mesazheve të tilla nuk duhet të interpretohet si dështim i strukturave shtetërore.
“Nuk ka kërcënime të vërteta dhe këto mesazhe nuk përdoren për të lënduar, por për të trembur. Ato duan të shkaktojnë frikë e kaos. Mesazhe të tilla mund të dërgohen përsëri, por kjo nuk do të thotë se diçka nuk ka funksionuar. Nuk do të lejojmë që një email anonim të përcaktojë kalendarin e fëmijëve tanë. Kushdo që e bëri këtë donte një vend të bllokuar, por nesër do të shohin një Itali që zgjohet, shoqëron fëmijët në shkollë dhe shkon në punë,” deklaroi Giorgia Meloni.
Kryeministrja njoftoi gjithashtu se ditën e nesërme do të zhvillojë një takim me liderët e partive opozitare për të diskutuar situatën e sigurisë, duke garantuar se Italia do të ruajë një nivel të lartë gatishmërie pa cenuar funksionimin normativ të shoqërisë.
