TIRANË — Kryetari i Partisë Demokratike, Sali Berisha, ka mbajtur një konferencë për mediat ku ka lëshuar akuza të forta ndaj mazhorancës, duke pretenduar se Partia Socialiste po shpërndan 1.5 miliardë euro për “hajdutët lokalë” në kuadër të përgatitjeve për zgjedhjet lokale. Berisha theksoi se PD-ja është e fokusuar tek këto zgjedhje dhe se kandidatët do të prezantohen shumë shpejt.
Gjatë fjalës së tij, ai sqaroi arsyet e vizitës së tij në Shtetet e Bashkuara të Amerikës, duke bërë me dije se do të udhëtojë drejt Teksasit për të marrë pjesë në një konferencë të Partisë Republikane Amerikane për zgjedhjet “mid-term”, si pjesë e një delegacioni të Unionit Demokrat Ndërkombëtar ku është i ftuar. Ai shtoi gjithashtu se nuk ka pasur njoftim paraprak nga Ambasada Amerikane për marrjen e vizës.
Në lidhje me reformën territoriale, Berisha dënoi sërish ndarjen e re të propozuar nga mazhoranca dhe nënvizoi rëndësinë e dëgjimit të zërit të qytetarëve, duke kërkuar kalimin drejt ushtrimit të referendumeve sipas standardeve dhe kërkesave ndërkombëtare.
