Qeveria ka miratuar nismat e para të paketës së re ligjore kundër dhunës, të prezantuar pas protestave të dhunshme. Masat parashikojnë rritjen e gjobave për shkeljet gjatë tubimeve, kufizime të përkohshme në zona të caktuara, regjistrimin audiovizual të paralajmërimeve të policisë dhe krijimin e një regjistri të posaçëm elektronik për personat e referuar ose nën hetim për vepra penale të kryera me dhunë gjatë grumbullimeve dhe manifestimeve publike.
Sipas ndryshimeve në ligjin për tubimet, pjesëmarrja në një tubim të ndaluar do të dënohet me gjobë nga 10 000 deri në 100 000 lekë. Në të njëjtën masë do të dënohet edhe fshehja e identitetit, ndërsa mosbindja ndaj urdhrit të policisë për ndërprerjen dhe shpërndarjen e tubimit do të dënohet me gjobë nga 10 000 deri në 100 000 lekë, ose nga 20 000 deri në 200 000 lekë, në varësi të rastit.
Kur personi ndaj të cilit është dhënë urdhri i shpërndarjes ka identitet të fshehur, gjoba parashikohet nga 50 000 deri në 500 000 lekë. Ndërkohë, bllokimi i rrugëve automobilistike ose i akseve rrugore gjatë tubimeve, kur pengohet qarkullimi i mjeteve dhe veprimi nuk përbën vepër penale, dënohet me 5 000 lekë për çdo ditë bllokimi dhe për çdo person që merr pjesë në të.
Policia mund të kufizojë përkohësisht tubimet në zona të caktuara
Ndryshimet ligjore parashikojnë mundësinë që drejtuesi i drejtorisë vendore të policisë, me miratimin e prefektit, të ndalojë ose të kufizojë tubimet në një perimetër të përcaktuar rreth institucioneve arsimore, shëndetësore ose shtetërore, për një periudhë jo më të gjatë se 72 orë.
Kjo masë mund të merret kur ekziston një rrezik real, serioz dhe i afërt për dhunë ndaj personave ose për dëmtime të rënda të pronës, i bazuar në fakte konkrete. Vendimi duhet të përcaktojë perimetrin, kohëzgjatjen dhe arsyet e kufizimit, si dhe të publikohet përpara se të zbatohet. Ai mund të rinovohet vetëm një herë, përmes një vendimi të ri të arsyetuar.
Personat e interesuar mund ta ankimojnë vendimin në gjykatën administrative, e cila duhet të vendosë brenda 48 orëve. Ankimi nuk e pezullon zbatimin e vendimit, përveç rasteve kur gjykata vendos ndryshe.
Kufizimi nuk mund të përfshijë të gjithë territorin e një njësie të vetëqeverisjes vendore. Ai nuk zbatohet as ndaj të miturve të shoqëruar nga prindi, kujdestari ligjor ose një i rritur përgjegjës, kur kalojnë nëpër perimetrin e përcaktuar për të shkuar ose për t’u kthyer nga shkolla, banesa, institucionet shëndetësore e të përkujdesjes sociale, apo veprimtari edukative, kulturore dhe sportive.
Në paketë përcaktohen gjithashtu zonat e mbrojtura, ku përfshihen stacionet, terminalet dhe mjetet e transportit publik, portet dhe aeroportet, perimetrat rreth institucioneve arsimore, shëndetësore dhe objekteve të trashëgimisë kulturore, si dhe zona të tjera të përcaktuara me vendim të këshillit bashkiak, ku janë dokumentuar vepra të përsëritura kundër personit ose pronës.
Në këto zona, punonjësi i Policisë së Shtetit mund t’i urdhërojë një personi të largohet për një periudhë deri në 48 orë, kur sjellja e tij konkrete përbën kanosje, ngacmim të përsëritur, dhunë ndaj personave, dëmtim të pronës ose pengim me dhunë të aksesit dhe përdorimit të zonës.
Urdhri duhet të jepet me shkrim, të përmbajë faktet dhe arsyet mbi të cilat mbështetet, si dhe të përcaktojë zonën dhe kohëzgjatjen e masës. Ai nuk zbatohet për vendbanimin, vendin e punës, institucionin arsimor, institucionin shëndetësor ku personi trajtohet dhe zyrën e avokatit. Po ashtu, urdhri nuk mund të jepet për shkak të pjesëmarrjes në një tubim paqësor, karakteristikave personale, statusit social, kombësisë, pamjes ose vetëm për shkak të precedentëve penalë.
Parashikohen masa për thirrjet për dhunë në rrjetet sociale
Ndryshimet në ligjin për tubimet parashikojnë edhe procedura për rastet kur, nëpërmjet rrjeteve sociale, postës elektronike ose komunikimeve telefonike, publikohen apo shpërndahen mesazhe me thirrje për dhunë në kuadër të organizimit ose zhvillimit të një tubimi.
Në këto raste, pasi të identifikojë llogarinë, adresën elektronike ose numrin e telefonit nga i cili është kryer komunikimi, Policia e Shtetit i dërgon personit një njoftim përmes të njëjtit kanal, duke i kërkuar fshirjen e përmbajtjes dhe mospërsëritjen e veprimeve. Në njoftim, policia duhet ta informojë personin se veprimet përbëjnë shkelje të legjislacionit në fuqi.
Policia i ofron gjithashtu mundësinë për të përfituar mbështetje psikologjike ose trajtime të tjera të specializuara, kur vlerësohet se ka nevojë për to. Nëse përmbajtja nuk fshihet ose veprimet përsëriten, policia ndërmerr masat përkatëse sipas legjislacionit në fuqi.
Një tjetër ndryshim parashikon që Policia e Shtetit të regjistrojë me mjete audiovizuale paralajmërimet për shpërndarjen e tubimit, si dhe aktet e dhunës ndaj personave ose dëmtimet e pronës gjatë tij. Regjistrimet do të ruhen dhe përpunohen në përputhje me ligjin për riparimin e dëmeve të shkaktuara nga dhuna dhe dëmtimet e pronës gjatë tubimeve në hapësirën publike, si dhe me ligjin për mbrojtjen e të dhënave personale.
Regjistër elektronik për personat e referuar ose nën hetim
Një tjetër masë e miratuar është krijimi dhe funksionimi i një regjistri të posaçëm elektronik për personat e referuar ose nën hetim për vepra penale kundër autoritetit shtetëror, rendit dhe sigurisë publike, kur faktet përfshijnë veprime të dhunshme ndaj jetës, shëndetit të personave ose pronës publike dhe private gjatë grumbullimeve e manifestimeve publike.
Regjistri do të administrohet nga Drejtoria e Përgjithshme e Policisë së Shtetit dhe do të përmbajë të dhënat e personave të identifikuar në materialet e referuara nga policia në prokurori, për të cilët janë dokumentuar veprime konkrete të dhunshme.
Në të do të përfshihen të dhëna identifikuese dhe procedurale, burimi i informacionit, data e regjistrimit, historiku i përditësimeve, numri i referimit, data e ngjarjes dhe masat kufizuese në fuqi, nëse janë njoftuar të tilla. Të dhënat do të sigurohen edhe përmes ndërveprimit me Regjistrin Kombëtar të Gjendjes Civile dhe sistemet përkatëse elektronike të Policisë së Shtetit.
Policia Kufitare dhe e Migracionit do të ketë akses të kufizuar në regjistër, vetëm për verifikime kufitare dhe zbatimin e masave kufizuese të parashikuara me ligj. Kur nga verifikimi individual rezultojnë të dhëna konkrete për pjesëmarrje në veprime të dhunshme gjatë manifestimeve dhe grumbullimeve publike, policia kufitare mund të refuzojë administrativisht daljen jashtë shtetit, edhe kur ndaj personit nuk është vendosur masë sigurie për ndalimin e largimit.
Në rastet kur personit nuk i refuzohet dalja, autoritetet kufitare njoftojnë autoritetet e vendit ku ai do të udhëtojë. Drejtoria e Përgjithshme e Policisë së Shtetit do të njoftojë gjithashtu personat fizikë dhe juridikë privatë që kanë struktura akomoduese për personat për të cilët ka të dhëna konkrete mbi pjesëmarrjen në veprimet e dhunshme dhe për të cilët materialet përkatëse i janë referuar prokurorisë.
Nevoja për ruajtjen e të dhënave të personave të referuar do të rishikohet brenda 30 ditëve nga regjistrimi. Nëse prokuroria kompetente njofton se nuk do të fillojë procedimi penal ose se çështja është pushuar, të dhënat e personit do të fshihen nga regjistri.
Përpunimi dhe shkëmbimi i të dhënave duhet të kryhen në përputhje me ligjin për mbrojtjen e të dhënave personale, duke garantuar konfidencialitetin, kufizimin e aksesit, gjurmueshmërinë dhe proporcionalitetin.
Për zbatimin e vendimit ngarkohen Ministria e Punëve të Brendshme, Drejtoria e Përgjithshme e Policisë së Shtetit dhe Agjencia Kombëtare e Shoqërisë së Informacionit.
A K T N O R M A T I V
PËR
DISA SHTESA DHE NDRYSHIME NË LIGJIN NR.8773, DATË 23.4.2001, “PËR TUBIMET”
Në mbështetje të nenit 101 të Kushtetutës, me propozimin e ministrit të Punëve të Brendshme, Këshilli i Ministrave
V E N D O S I:
Në ligjin nr.8773, datë 23.4.2001, “Për tubimet”, bëhen këto shtesa dhe ndryshime:
Neni 1
Pas nenit 12 shtohen nenet 12/1 e 12/2, me këtë përmbajtje:
“Neni 12/1
Kufizimet e përkohshme rreth objekteve të përcaktuara
1. Kur ka rrezik real, serioz e të afërt, të bazuar në fakte konkrete, për dhunë ndaj personave ose për dëmtime të rënda të pronës, drejtuesi i drejtorisë vendore të policisë, me miratimin e prefektit, mund të ndalojë ose të kufizojë tubimet në një perimetër të përcaktuar rreth institucioneve arsimore, shëndetësore ose shtetërore, për një periudhë jo më të gjatë se 72 orë.
2. Vendimi përcakton saktësisht perimetrin, kohëzgjatjen dhe arsyet, publikohet menjëherë në mënyrë të aksesueshme dhe zbatohet vetëm pas publikimit. Ai mund të rinovohet vetëm një herë, me vendim të ri të arsyetuar.
3. Çdo person i interesuar mund ta ankimojë vendimin në gjykatën administrative, e cila vendos brenda 48 orëve. Ankimi nuk e pezullon zbatimin, përveç kur gjykata vendos ndryshe.
4. Kufizimi nuk mund të përfshijë të gjithë territorin e një njësie të vetëqeverisjes vendore dhe nuk zbatohet ndaj të miturve të shoqëruar nga prindi, kujdestari ligjor ose një i rritur përgjegjës, kur ata kalojnë nëpër perimetrin e përcaktuar për të shkuar ose për t’u kthyer nga shkolla, vendbanimi, institucioni shëndetësor, institucioni i përkujdesjes sociale ose një veprimtari edukative, kulturore apo sportive.
5. Ky nen nuk cenon kompetencën e drejtuesit të komisariatit të policisë për ndalimin ose kufizimin e një tubimi të caktuar, sipas nenit 8, të këtij ligji.
Neni 12/2
Urdhri i largimit nga zonat e mbrojtura
1. Në kuptim të këtij ligji, zona të mbrojtura janë:
a) stacionet, terminalet dhe mjetet e transportit publik, portet dhe aeroportet;
b) perimetri rreth institucioneve arsimore, shëndetësore dhe objekteve të trashëgimisë kulturore;
c) zonat e tjera të përcaktuara me vendim të këshillit bashkiak të botuar dhe të shënuara në terren, kur atje janë dokumentuar vepra të përsëritura kundër personit ose pronës.
2. Punonjësi i Policisë së Shtetit mund të urdhërojë një person të largohet nga një zonë e mbrojtur për një periudhë jo më të gjatë se 48 orë, kur personi, me sjelljen e tij konkrete, kanos, ngacmon në mënyrë të përsëritur ose ushtron dhunë ndaj personave, dëmton pronën ose pengon me dhunë aksesin dhe përdorimin e zonës.
3. Urdhri jepet me shkrim, përmban faktet konkrete dhe arsyet, mbi të cilat mbështetet, përcakton zonën, nga e cila personi duhet të largohet, dhe kohëzgjatjen e masës, si dhe i njoftohet personit, të cilit i dorëzohet një kopje. Ai nuk zbatohet për vendbanimin, vendin e punës, institucionin arsimor, institucionin shëndetësor, ku personi trajtohet, dhe zyrën e avokatit.
4. Urdhri nuk mund të jepet për shkak të pjesëmarrjes në një tubim paqësor, për shkak të karakteristikave personale të personit, statusit social, kombësisë ose pamjes së tij, apo vetëm për shkak të precedentëve penalë.”.
Neni 2
Pas nenit 19 shtohet neni 19/1, me këtë përmbajtje:
“Neni 19/1
Thirrjet për dhunë nëpërmjet rrjeteve sociale gjatë organizimit dhe zhvillimit të tubimeve
1. Kur, nëpërmjet rrjeteve sociale, postës elektronike dhe/ose komunikimeve telefonike, përcillen, publikohen ose shpërndahen mesazhe, që përmbajnë thirrje për dhunë, në kuadër të organizimit ose zhvillimit të një tubimi, Policia e Shtetit, pasi identifikon llogarinë, adresën elektronike dhe/ose numrin e telefonit, nëpërmjet të cilit është kryer komunikimi, i dërgon mbajtësit të llogarisë, adresës elektronike ose numrit të telefonit, një njoftim nëpërmjet të njëjtit kanal komunikimi, me anë të të cilit i kërkon fshirjen e përmbajtjes, si dhe mospërsëritjen e veprimeve të tilla, duke e vënë në dijeni se ato përbëjnë shkelje të legjislacionit në fuqi.
2. Në njoftimin e parashikuar në pikën 1, të këtij neni, Policia e Shtetit i ofron personit mundësinë për të përfituar mbështetje psikologjike apo trajtime të tjera të specializuara, kur vlerësohet se ka nevojë për to.
3. Në rast se përmbajtja nuk fshihet ose veprimet e parashikuara në pikën 1, të këtij neni, përsëriten, Policia e Shtetit ndërmerr masat përkatëse, në përputhje me legjislacionin në fuqi.”.
Neni 3
Pas pikës 2, të nenit 21, shtohet pika 3, me këtë përmbajtje:
“3. Përjashtimisht, Policia e Shtetit regjistron me mjete audiovizuale paralajmërimet për shpërndarjen e tubimit dhe aktet e dhunës ndaj personave ose dëmtimet e pronës gjatë tubimit, sipas ligjit për riparimin e dëmeve të shkaktuara nga dhuna dhe dëmtimet e pronës gjatë tubimeve në hapësirën publike. Regjistrimet ruhen e përpunohen sipas atij ligji dhe ligjit nr.124/2024, “Për mbrojtjen e të dhënave personale.”.
Neni 4
Në nenin 24 bëhen këto ndryshime:
1. Në shkronjat “a” dhe “b”, fjalët “… nga 1000 deri në 10 000 lekë …” zëvendësohen me “… nga 10 000 (dhjetë mijë) deri në 100 000 (njëqind mijë) lekë …”.
2. Në shkronjën “c”, pas fjalëve “… me gjobë …” shtohen “… në masën nga 10 000 (dhjetë mijë) deri në 100 000 (njëqind mijë) lekë …”.
3. Në shkronjën “ç”, pas fjalëve “… me gjobë …” shtohen “… në masën nga 50 000 (pesëdhjetë mijë) deri në 100 000 (njëqind mijë) lekë …”.
Neni 5
Pas nenit 24 shtohet neni 24/1, me këtë përmbajtje:
“Neni 24/1
Kundërvajtjet administrative
1. Shkeljet e këtij ligji, kur nuk përbëjnë vepër penale, përbëjnë kundërvajtje administrative dhe dënohen, si më poshtë:
a) Pjesëmarrja në një tubim të ndaluar, në kundërshtim me nenet 8 dhe 12/1, të këtij ligji, dënohet më gjobë në masën nga 10 000 (dhjetë mijë) deri në 100 000 (njëqind mijë) lekë;
b) Mosbindja ndaj urdhrit të policisë për ndërprerjen dhe shpërndarjen e tubimit, të dhënë në përputhje me shkronjat “a” dhe “c”, të nenit 9, të këtij ligji, dënohet me gjobë nga 10 000 (dhjetë mijë) deri në 100 000 (njëqind mijë) lekë;
c) Mosbindja ndaj urdhrit të policisë për ndërprerjen dhe shpërndarjen e tubimit, të dhënë në përputhje me shkronjën “b”, të nenit 9, të këtij ligji, dënohet me gjobë nga 20 000 (njëzet mijë) deri në 200 000 (dyqind mijë) lekë;
ç) Mosbindja ndaj urdhrit të policisë për ndërprerjen dhe shpërndarjen e tubimit, të dhënë në përputhje me shkronjën “b”, të nenit 9, të këtij ligji, dhe në rastet kur personi, ndaj të cilit është dhënë urdhri i shpërndarjes, është me identitet të fshehur, dënohet me gjobë nga 50 000 (pesëdhjetë mijë) deri në 500 000 (pesëqind mijë) lekë;
d) Moszbatimi i urdhrit të largimit nga zona e mbrojtur, të nxjerrë në përputhje me nenin 12/2, të këtij ligji, dënohet me gjobë në masën nga 10 000 (dhjetë mijë) deri në 100 000 (njëqind mijë) lekë;
dh) Fshehja e identitetit në kundërshtim me nenin 19, të këtij ligji, dënohet me gjobë në masën nga 10 000 (dhjetë mijë) deri në 100 000 (njëqind mijë) lekë. Sanksioni i parashikuar në këtë shkronjë nuk zbatohet kur mbulimi i fytyrës justifikohet nga një shkak i ligjshëm, përfshirë arsye shëndetësore, fetare, si dhe ushtrimin e një veprimtarie profesionale, përfshirë gazetarinë dhe medien, ofrimin e ndihmës mjekësore ose vëzhgimin e tubimit;
e) Përdorimi i uniformës, i shenjave ose i simboleve, në kundërshtim me nenin 20, të këtij ligji, dënohet me gjobë në masën nga 50 000 (pesëdhjetë mijë) deri në 100 000 (njëqind mijë) lekë;
ë) Mosbindja ndaj thirrjeve për largim, sipas nenit 23, të këtij ligji, dënohet me gjobë në masën nga 10 000 (dhjetë mijë) deri në 100 000 (njëqind mijë) lekë.
2. Bllokimi i rrugëve automobilistike ose i akseve rrugore gjatë zhvillimit të një tubimi, me pasojë pengimin e qarkullimit të mjeteve të transportit, kur veprimi nuk përbën vepër penale, përbën kundërvajtje administrative dhe dënohet me gjobë në masën 5 000 (pesë mijë) lekë për çdo ditë bllokimi, për çdo person fizik (individ), që merr pjesë në bllokim, pavarësisht kohëzgjatjes së bllokimit gjatë asaj dite.
3. Gjobat vendosen nga Policia e Shtetit, në përputhje me ligjin nr.10279, datë 20.5.2010, “Për kundërvajtjet administrative”, të ndryshuar.”.
Neni 6
Hyrja në fuqi
Ky akt normativ hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
V E N D I M
PËR
KRIJIMIN DHE FUNKSIONIMIN E REGJISTRIT TË POSAÇËM ELEKTRONIK TË PERSONAVE TË REFERUAR OSE NËN HETIM PËR VEPRA PENALE KUNDËR RENDIT DHE SIGURISË PUBLIKE, TË KRYERA ME DHUNË GJATË GRUMBULLIMEVE DHE MANIFESTIMEVE PUBLIKE, SHKËMBIMIN E TË DHËNAVE DHE VERIFIKIMET KUFITARE
Në mbështetje të nenit 100 të Kushtetutës, të nenit 4, të ligjit nr.10325, datë 23.9.2010, “Për bazat e të dhënave shtetërore”, të ligjit nr.39/2025, “Për kontrollin e kufirit shtetëror”, dhe të ligjit nr.82/2024, “Për Policinë e Shtetit”, të ndryshuar, me propozimin e ministrit të Punëve të Brendshme, Këshilli i Ministrave
V E N D O S I:
1. Krijimin dhe funksionimin e regjistrit të posaçëm elektronik të personave të referuar ose nën hetim për veprat penale kundër autoritetit shtetëror, rendit dhe sigurisë publike, të parashikuara në seksionet I dhe III, të kreut VIII, të pjesës së posaçme të Kodit Penal, por pa u kufizuar në to, kur faktet përfshijnë kryerjen e veprimeve të dhunshme në dëm të jetës dhe shëndetit të personit ose pronës publike dhe private në grumbullime e manifestime publike.
2. Regjistri administrohet nga Drejtoria e Përgjithshme e Policisë së Shtetit dhe përmban të dhënat e personave të identifikuar në materialet e referuara nga Policia e Shtetit në Prokurori, për të cilët dokumentohen veprime konkrete të dhunshme.
3. Regjistri përmban:
a) të dhëna parësore: numrin unik të regjistrimit, burimin e informacionit, datën e regjistrimit, të dhëna procedurale për personin dhe historikun e përditësimeve;
b) të dhëna dytësore: identitetin e personit që sigurohet nëpërmjet ndërveprimit me Regjistrin Kombëtar të Gjendjes Civile, i administruar nga Drejtoria e Përgjithshme e Gjendjes Civile.
Numrin e referimit, datën e ngjarjes dhe masat kufizuese në fuqi, nëse janë njoftuar të tilla, që sigurohen nga sistemi ADAM dhe regjistrat përkatës elektronikë të Policisë së Shtetit.
4. Shkëmbimi realizohet përmes ndërveprimit elektronik të autorizuar, pa krijuar akses të përgjithshëm të Policisë së Shtetit në regjistrat e prokurorisë.
5. Policia Kufitare dhe e Migracionit ka akses të kufizuar në regjistër, vetëm për qëllime të verifikimit kufitar dhe të zbatimit të masave kufizuese, të parashikuara me ligj. Kur nga verifikimi individual rezultojnë të dhëna konkrete për pjesëmarrje në veprime të dhunshme gjatë manifestimeve e grumbullimeve publike edhe nëse ndaj personit nuk është vendosur masa e sigurimit për ndalimin e largimit jashtë shtetit, Policia Kufitare ka të drejtën e refuzimit administrativ të daljes, sipas shkronjës “c”, të pikës 7, nenit 6, të ligjit nr.39/2025, “Për kontrollin e kufirit shtetëror”.
Në çdo rast, nëse ndaj personit nuk vendoset refuzimi i daljes, autoritetet kufitare njoftojnë autoritetet e vendit ku do të udhëtojë personi për faktin e referimit të tij për veprat e përmendura në pikën 1, të këtij vendimi.
6. Drejtoria e Përgjithshme e Policisë së Shtetit njofton personat fizikë dhe juridikë privatë, që kanë struktura akomoduese, për personat për të cilët ka të dhëna konkrete për pjesëmarrje në veprimet e sipërpërmendura dhe se për këtë i janë referuar materialet përkatëse prokurorisë.
7. Për personat e referuar, nevoja për ruajtjen e të dhënave rishikohet brenda 30 (tridhjetë) ditëve nga regjistrimi. Në rast të marrjes së informacionit nga prokuroria kompetente për mosfillimin e procedimit penal apo pushimin e çështjes, të dhënat e personit fshihen nga regjistri.
8. Përpunimi dhe shkëmbimi i të dhënave kryhen në përputhje me ligjin nr.124/2024, “Për mbrojtjen e të dhënave personale”, duke garantuar konfidencialitetin, kufizimin e aksesit, gjurmueshmërinë dhe proporcionalitetin.
9. Ngarkohen Ministria e Punëve të Brendshme, Drejtoria e Përgjithshme e Policisë së Shtetit dhe Agjencia Kombëtare e Shoqërisë së Informacionit për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
