Aktorja e njohur e kinemasë shqiptare, Rezana Çeliku, është ndarë nga jeta në moshën 66-vjeçare, duke lënë pas një kontribut të spikatur në artin dhe kulturën shqiptare.
Çeliku u bë e njohur për publikun përmes disa roleve në filma të njohur shqiptarë, ndër të cilët “Ata ishin katër”, “Shokë të një skuadre” dhe “Një djalë dhe një vajzë”. Në këtë të fundit, ajo interpretoi rolin e një centralisteje, një personazh që për kohën u konsiderua i veçantë dhe guximshëm i trajtuar, pasi përfshihej në një marrëdhënie me një djalë më të ri në moshë. Roli ngjalli diskutime dhe mbeti ndër interpretimet më të veçuara të aktores.
Përveç aktivitetit artistik, Rezana Çeliku kishte ndjekur studimet në Fakultetin Ekonomik dhe atë të Drejtësisë. Më pas, ajo punoi edhe pranë Departamentit të Marrëdhënieve me Publikun në Bashkinë e Tiranës.
Aktorja ishte gjithashtu e angazhuar në prezantimin e koncerteve dhe mbrëmjeve artistike, duke qenë një figurë e njohur për publikun edhe përtej ekranit.
Ndarja e saj nga jeta shënon humbjen e një emri që kontribuoi në kinemanë dhe jetën kulturore shqiptare, veçanërisht gjatë një periudhe të rëndësishme të zhvillimit të filmit shqiptar.
