VAU I DEJËS — Një ngjarje e rëndë kriminale brenda familjes ka ndodhur rreth orës 13:00 të ditës së sotme në fshatin Barbullush të bashkisë Vau i Dejës, ku një burrë ka goditur me mjet të fortë bashkëshorten e tij, duke i shkaktuar dëmtime shumë të rënda trupore.
Sipas të dhënave të konfirmuara, shtetasi Vlash Krajni, 73 vjeç, dyshohet se ka goditur me çekiç në kokë bashkëshorten e tij, shtetasen Leze Krajni, 68 vjeçe. Si pasojë e goditjeve të rënda, e dëmtuara është transportuar me urgjencë nga ekipi mjekësor drejt Spitalit Rajonal të Shkodrës, ku ndodhet në gjendje kritike dhe në rrezik për jetën.
Reagimi i menjëhershëm i shërbimeve të Policisë Vendore ka bërë të mundur kapjen dhe shoqërimin e menjëhershëm të 73-vjeçarit Vlash Krajni në ambientet e Komisariatit për kryerjen e veprimeve të mëtejshme procedurale e hetimore.
Motivet e këtij krimi të rëndë në familje mbeten ende të paqarta. Grupi hetimor ndodhet në vendngjarje dhe po vijon punën për dokumentimin e plotë ligjor dhe zbardhjen e rrethanave të ngjarjes.
Vau i Dejës/Informacion paraprak
Rreth orës 13:00, në fshatin Barbullush, shtetasi V. K. 73 vjeç, dyshohet se ka goditur me çekiç, në kokë, bashkëshorten e tij, shtetasen L. K., 68 vjeçe,e cila është dëmtuar rëndë.
Shtetasi V. K. është kapur nga shërbimet e Policisë dhe është shoqëruar në Komisariat, për veprime të mëtejshme.
Grupi hetimor vijon punën për dokumentimin e rrethanave të rastit.
