Universiteti i Elbasanit “Aleksandër Xhuvani” ceremoni madhështore për brezin e ri të të diplomuarve: “Tani është radha juaj të ndërtoni të ardhmen”

0
10

Elbasan, 19 nëntor 2026 – Universiteti i Elbasanit “Aleksandër Xhuvani” ka zhvilluar ceremoninë e diplomimit për brezin e ri të studentëve të vitit akademik 2025–2026. Në këtë ditë të shënuar, e cila kurorëzon vite përkushtimi dhe sakrifice akademike, u mblodhën të diplomuarit e pesë fakulteteve, pedagogë, dekanë, drejtues departamentesh, si dhe prindër e familjarë të shumtë.

Gjatë fjalës së saj përshëndetëse, Rektorja e Universitetit, Prof. Dr. Elvira Fetahu, vlerësoi rrugëtimin e studentëve dhe investimet e institucionit në përmirësimin e infrastrukturës, laboratorëve, bibliotekës, përditësimin e kurrikulave dhe zgjerimin e bashkëpunimeve ndërkombëtare. Ajo veçoi rëndësinë e lidhjes së formimit akademik me tregun e punës, përmes partneriteteve me institucione e biznese që u ofrojnë të rinjve mundësi praktike, trajnime dhe nisma sociale.

Duke iu drejtuar të diplomuarve, Rektorja Fetahu theksoi se ata po hyjnë në një realitet dinamik, ku teknologjia, inteligjenca artificiale dhe zhvillimet ekonomike po transformojnë profesionet dhe mënyrën e të punuarit.

“Diploma që merrni sot dëshmon atë që keni mësuar, por ajo që do të bëni nesër me dijen tuaj do të dëshmojë se cilët jeni. Ju po hyni në një botë që ndryshon me shpejtësi, ku teknologjia dhe inteligjenca artificiale po transformojnë profesionet. Prandaj, mos reshtni kurrë së mësuari dhe mos kini frikë nga sfidat. Shqipëria ka nevojë për energjinë, idetë dhe guximin tuaj. Ne ju kemi ndihmuar të ndërtoni themelet, tani është radha juaj të ndërtoni të ardhmen”, u shpreh Prof. Dr. Elvira Fetahu.

Ajo i inkurajoi të rinjtë të ruajnë kuriozitetin, mendimin kritik dhe integritetin profesional, pavarësisht nëse do të ndërtojnë karrierën brenda apo jashtë vendit, duke u bërë ambasadorë të universitetit dhe duke e vënë dijen në shërbim të shoqërisë. Një falënderim të veçantë Rektorja drejtoi për prindërit dhe familjarët për mbështetjen e vazhdueshme, si dhe për stafin akademik për kontributin në formimin e këtij brezi.

Universiteti i Elbasanit “Aleksandër Xhuvani” mbetet një nga qendrat kryesore të arsimit të lartë në vend, me një traditë që nis nga Shkolla Normale. Institucioni përbëhet nga pesë fakultete, ku ofrohen mbi 100 programe studimi në ciklet Bachelor, Master, Doktoraturë dhe diploma profesionale.

Fjala përshëndetëse e Rektores, Prof. Dr. Elvira Ftahu, në Ceremoninë e Diplomimit për Vitin Akademik 2025–2026

Të nderuar diplomantë,

Të dashur prindër, familjarë dhe të afërm,

Të nderuar dekanë dhe drejtues të departamenteve,

Është një kënaqësi e veçantë t’ju uroj mirëseardhjen në Ceremoninë e Diplomimit të Universitetit të Elbasanit “Aleksandër Xhuvani”, për vitin akademik 2025–2026.

Kjo është një ditë e veçantë për secilin prej jush, por edhe për universitetin tonë. Një ditë që kurorëzon vite përkushtimi, sakrifice dhe përpjekjesh, por që njëkohësisht shënon fillimin e një kapitulli të ri në jetën tuaj.

Për ne, si universitet, suksesi juaj është edhe dëshmi e misionit tonë. Gjatë këtyre viteve jemi përpjekur t’ju ofrojmë jo vetëm dije dhe formim profesional, por edhe një mjedis gjithëpërfshirës, mundësi zhvillimi dhe përvoja që ju ndihmojnë të ndërtoni të ardhmen.

Këtë e kemi realizuar përmes përmirësimit të vazhdueshëm të infrastrukturës, pasurimit të laboratorëve dhe bibliotekës, përditësimit të kurrikulave dhe zhvillimit profesional të personelit akademik. Por formimi juaj nuk është kufizuar vetëm brenda auditorëve.

Përmes marrëveshjeve dhe bashkëpunimeve ndërkombëtare, ju keni pasur mundësi të merrni pjesë në programe shkëmbimi, trajnime, konferenca shkencore, veprimtari vullnetarizmi dhe nisma sociale.

Një rëndësi të veçantë i kemi kushtuar edhe lidhjes së formimit akademik me tregun e punës. Krijimi i partneriteteve me institucione lokale dhe kombëtare ka forcuar lidhjet e Universitetit me botën profesionale, duke u ofruar studentëve mundësi për trajnime, workshope dhe zhvillimin e aftësive praktike.

Të dashur të diplomuar,

Dua t’ju ftoj të ktheheni për një çast pas në kohë, në ditën kur u ulët për herë të parë në auditorët e Universitetit të Elbasanit. Me siguri e mbani mend emocionin e fillimit, fytyrat e panjohura, pritshmëritë dhe ndoshta edhe pasiguritë për atë që ju priste.

Sot jeni këtu, më të rritur, më të përgatitur, me përvoja të reja, miqësi të krijuara dhe një arritje që dëshmon punën dhe përkushtimin tuaj ndër vite. Por ajo që më bën veçanërisht krenare sot nuk është vetëm ajo që keni arritur deri këtu, por gjithçka që keni mundësinë të arrini nga kjo ditë e tutje.

Diploma që merrni sot dëshmon atë që keni mësuar. Por ajo që do të bëni nesër me dijen tuaj do të dëshmojë se cilët jeni. Ju po hyni në një botë që ndryshon me një shpejtësi të jashtëzakonshme. Teknologjia, inteligjenca artificiale, zhvillimet shkencore dhe transformimet ekonomike po ndryshojnë profesionet, mënyrën se si punojmë dhe aftësitë që kërkon shoqëria.

Në këtë realitet të ri, nuk do të mjaftojë vetëm ajo që dini sot. Do të ketë gjithnjë e më shumë rëndësi aftësia për të mësuar vazhdimisht, për të menduar në mënyrë kritike, për të krijuar dhe për t’u përshtatur. Prandaj, mos reshtni kurrë së mësuari. Jini kuriozë, kërkoni gjithmonë më shumë nga vetja dhe mos kini frikë të eksploroni rrugë të reja.

Mos kini frikë as nga sfidat. Suksesi nuk vjen gjithmonë menjëherë dhe jo çdo zgjedhje do të jetë e duhura që në fillim. Do të ketë pengesa, pasiguri dhe ndoshta edhe dështime. Por mos lejoni që frika nga gabimi t’ju pengojë të provoni përsëri. Mos e matni suksesin vetëm me pozicionin profesional, titullin apo shpejtësinë me të cilën do të ndërtoni karrierën tuaj.

Mateni me guximin për të marrë iniciativa, me këmbënguljen për të ndjekur qëllimet tuaja, me aftësinë për t’u ringritur dhe, mbi të gjitha, me vlerën që do të krijoni për njerëzit dhe shoqërinë. Sepse një profesionist i mirë nuk është vetëm ai që zotëron njohuri, por ai që di t’i përdorë ato me përgjegjësi, integritet dhe humanizëm.

Dhe, kudo që të shkoni, mos harroni vlerat tuaja dhe vendin nga ku nisët.

Shqipëria ka nevojë për energjinë tuaj, për idetë, profesionalizmin dhe guximin tuaj për të sjellë ndryshim. Ka nevojë për mësues që frymëzojnë brezat, për profesionistë të shëndetësisë që kujdesen me përkushtim, për ekonomistë e sipërmarrës që krijojnë mundësi, për studiues, specialistë dhe qytetarë që kontribuojnë me përgjegjësi.

Disa prej jush do ta ndërtojnë të ardhmen këtu, të tjerë do të ndjekin mundësi jashtë vendit. Cilado qoftë rruga që do të zgjidhni, dëshira ime është të jeni të suksesshëm, të ruani lidhjen me universitetin tuaj dhe të mos harroni se dija merr kuptimin e saj më të madh kur vihet në shërbim të të tjerëve.

Për Universitetin e Elbasanit, kjo ceremoni është një moment krenarie, por edhe një kujtesë e përgjegjësisë që kemi për të ardhmen. Ne besojmë se universiteti i së ardhmes nuk mund të jetë vetëm një vend ku transmetohet dije.

Ai duhet të jetë një hapësirë ku zhvillohen aftësi, lindin ide, ndërtohen partneritete dhe krijohen mundësi reale për të rinjtë.

Ky është drejtimi ynë: një universitet gjithnjë e më i hapur ndaj shoqërisë, më i lidhur me tregun e punës, institucionet dhe biznesin; një universitet ku formimi akademik ndërthuret me praktikën dhe ku çdo student inkurajohet të ndërtojë perspektivën e tij. Sepse suksesi i një universiteti nuk matet vetëm me numrin e diplomave që lëshon, por mbi të gjitha me rrugët që hapin në jetë studentët e tij.

Të dashur prindër,

Në këtë ditë të veçantë, dua të ndalem edhe te njerëzit që qëndrojnë pas çdo arritjeje të fëmijëve tuaj: te ju, që keni qenë mbështetja e tyre në çdo hap të këtij rrugëtimi.

Mirënjohja jonë shkon për përkrahjen dhe besimin që na keni treguar, duke na bërë pjesë të procesit të arsimimit dhe formimit të tyre. Sot, teksa i shihni me krenari pranë jush, edhe ne ndihemi krenarë që kemi qenë pjesë e këtij rrugëtimi. Pas kësaj arritjeje qëndrojnë vite përkushtimi, sakrifice, mbështetjeje dhe dashurie, të cilat kanë luajtur një rol të pazëvendësueshëm në rrugën e tyre drejt suksesit.

Një falënderim i sinqertë shkon edhe për pedagogët dhe gjithë stafin e Universitetit të Elbasanit, të cilët me profesionalizmin dhe përkushtimin e tyre kanë kontribuar në formimin e këtij brezi.

 

Të dashur të diplomuar,

Nga sot, ju nuk do të jeni më vetëm studentët tanë. Ju do të jeni ambasadorët e Universitetit të Elbasanit, kudo që do t’ju çojë rruga juaj.

Lidhja juaj me këtë universitet nuk përfundon sot. Dyert tona do të jenë gjithmonë të hapura për ju, për t’u rikthyer, për të ndarë përvojat tuaja, për të bashkëpunuar dhe për të frymëzuar brezat që do të vijnë.

Dua ta mbyll me një mesazh që shpresoj ta mbani me vete:

Kur erdhët për herë të parë në këtë universitet, sollët me vete ëndrrat tuaja. Sot largoheni me dijen, përvojën dhe mundësitë për t’u dhënë atyre jetë.

Ne ju kemi ndihmuar të ndërtoni themelet. Tani është radha juaj të ndërtoni të ardhmen!

Ju uroj suksese në çdo hap të rrugëtimit tuaj! Qofshi gjithmonë krenarë për atë që keni arritur dhe mos reshtni së besuari në atë që mund të bëheni!

Urime dhe suksese të gjithëve!

S'KA KOMENTE

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu