Në kuadër të iniciativës “Zëri im, Politika ime”, në Librazhd u zhvillua një takim me të rinj aktivë të qytetit dhe përfaqësues të Bashkisë Librazhd, me fokus forcimin e dialogut dhe pjesëmarrjes së të rinjve në jetën publike dhe vendimmarrjen lokale.
Takimi krijoi një hapësirë të hapur bashkëbisedimi, ku të rinjtë patën mundësinë të ndajnë nevojat, shqetësimet dhe sfidat me të cilat përballen në komunitetin e tyre. Diskutimet u përqendruan gjithashtu te mundësitë konkrete që mund t’u ofrohen të rinjve për zhvillimin e aftësive, talenteve dhe potencialit të tyre në nivel lokal.
Përfshirja e të rinjve në procese të tilla dialogu është një hap i rëndësishëm për krijimin e politikave dhe nismave që i përgjigjen më mirë nevojave reale të komunitetit. Në këtë drejtim, bashkëpunimi ndërmjet të rinjve dhe institucioneve vendore mbetet thelbësor për të kthyer idetë dhe nevojat e tyre në iniciativa konkrete.
Iniciativa “Zëri im, Politika ime” synon pikërisht të nxisë këtë kulturë pjesëmarrjeje, duke u dhënë të rinjve më shumë hapësirë për të shprehur zërin e tyre dhe për të qenë pjesë aktive e vendimmarrjes.
Takimi në Librazhd shënoi një tjetër hap drejt ndërtimit të një marrëdhënieje më të drejtpërdrejtë mes të rinjve dhe institucioneve vendore, me synimin që zëri i të rinjve të mos mbetet vetëm pjesë e diskutimit, por të reflektohet në politikat dhe veprimet që ndikojnë drejtpërdrejt në jetën e tyre.
