Drejtori i Drejtorisë Vendore të Policisë Elbasan, Fatmir Hoxha, ka prezantuar rezultatet e punës së strukturave të policisë për periudhën maj–qershor 2026, në kuadër të qasjes së re të Policisë së Shtetit për komunikim më transparent me qytetarët dhe median.
Sipas raportit, gjatë kësaj periudhe janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Elbasan 428 raste të veprave penale, ndërsa janë zbuluar dhe dokumentuar 427 prej tyre, duke arritur një nivel zbardhjeje prej 99.76%.
Për këto raste janë proceduar penalisht 448 persona, nga të cilët 63 janë arrestuar në flagrancë, 16 janë ndaluar me urdhër të Prokurorisë, 4 janë shpallur në kërkim dhe 365 janë proceduar në gjendje të lirë.
Policia bën me dije se është dokumentuar plotësisht autorësia për 45 vepra penale kundër personit dhe 47 vepra penale kundër pasurisë, rezultat i punës hetimore, parandaluese dhe operacionale në bashkëpunim me Prokurorinë dhe institucionet e tjera ligjzbatuese.
14 operacione policore në dy muaj
Gjatë muajve maj dhe qershor janë zhvilluar 14 operacione policore, si rezultat i të cilëve janë arrestuar 16 persona, janë ndaluar 10, janë shpallur në kërkim 10 dhe janë proceduar në gjendje të lirë 3 shtetas.
Operacionet janë fokusuar në:
goditjen e prodhimit, shitjes dhe shpërndarjes së lëndëve narkotike, veçanërisht pranë institucioneve arsimore (5 operacione);
luftën kundër trafiqeve të paligjshme, përfshirë ndihmën për kalim të paligjshëm të kufirit, trafikimin e mjeteve motorike dhe trafikimin e lëndëve narkotike (4 operacione);
goditjen e kultivimit të bimëve narkotike në Librazhd, ku u arrestua një person dhe u asgjësuan 238 bimë narkotike;
goditjen e rasteve të vjedhjeve (4 operacione).
Drogë, armë dhe automjete të sekuestruara
Si rezultat i operacioneve, Policia ka sekuestruar:
1 kilogram heroinë;
50.4 kilogramë cannabis sativa;
177.7 gramë kokainë;
1 armë automatike dhe 2 pistoleta;
14 automjete dhe 1 motomjet;
43 telefona celularë;
4 peshore elektronike;
2 740 euro, 119 600 lekë, 15 paund, 20 franga zvicerane dhe 290 dinarë;
249 steka me cigare;
1 thikë.
Gjithashtu është ekzekutuar një vendim i Gjykatës së Posaçme kundër Korrupsionit dhe Krimit të Organizuar (GJKKO), duke vendosur sekuestro preventive mbi pasuri me vlerë 225 mijë euro, të dyshuara se janë përfituar nga veprimtari kriminale.
355 konflikte të parandaluara
Gjatë kësaj periudhe, strukturat e Policisë kanë trajtuar 355 konflikte, kryesisht për motive pronësie dhe motive të dobëta, duke ndërhyrë për zgjidhjen e tyre dhe kryer veprimet procedurale përkatëse.
Njëkohësisht ka vijuar kontrolli i zonave me risk për kultivimin e bimëve narkotike në bashkëpunim me institucionet përgjegjëse.
Masa për sigurinë publike dhe sezonin turistik
Policia ka garantuar rendin dhe sigurinë në 9 aktivitete publike, prej të cilave 5 sportive dhe 4 kulturore e fetare, pa u shënuar incidente.
Vëmendje e veçantë i është kushtuar edhe zonave turistike të qarkut. Gjatë muajve maj dhe qershor, Komisariatet e Policisë në Librazhd dhe Gramsh kanë ndërhyrë për t’u ardhur në ndihmë tre turistëve që hasën vështirësi gjatë lëvizjes në zonat malore.
121 shkelje rrugore dhe tre viktima në aksidente
Për shkak të rritjes së qarkullimit gjatë sezonit veror, Policia Rrugore ka intensifikuar kontrollet në të gjitha akset e qarkut.
Gjatë periudhës janë evidentuar 121 raste të shkeljes së rregullave të qarkullimit rrugor, ndërsa janë regjistruar 3 aksidente me pasojë humbjen e jetës.
Problematikat kryesore
Sipas Drejtorisë Vendore të Policisë Elbasan, sfidat kryesore mbeten:
shkeljet e rregullave të qarkullimit rrugor, veçanërisht drejtimi i automjeteve nën efektin e alkoolit, shpejtësia tej normave dhe manovrat e rrezikshme;
rastet e dhunës në familje;
prodhimi dhe shpërndarja e lëndëve narkotike.
Apeli i Policisë
Në përfundim të raportimit, drejtori Fatmir Hoxha siguroi se strukturat e Policisë do të vijojnë punën për parandalimin dhe goditjen e çdo paligjshmërie, duke apeluar ndaj qytetarëve të respektojnë rregullat e qarkullimit rrugor dhe të bashkëpunojnë me Policinë për denoncimin e çdo aktiviteti kriminal.
Ai theksoi se çdo informacion apo denoncim, përfshirë edhe ato që kanë të bëjnë me sjelljen e punonjësve të policisë, do të trajtohet me profesionalizëm, paanshmëri dhe në përputhje me ligjin.
