Pa praninë e partive të mëdha opozitare, është miratuar me votat e shumicës së parlamentit qeveria e re, e kryesuar nga kryeministri Albin Kurti.
Me 62 vota për, tetë kundër dhe asnjë abstenim, deputetët e Kuvendit të Kosovës kanë votuar qeverinë Kurti 4.
Në sallën plenare ishin të pranishëm deputetët e Lëvizjes Vetëvendosje dhe të Listës Serbe.
Ndërkohë, në sallë nuk ishin të pranishëm deputetët e PDK-së, pasi kjo parti ka deklaruar se nuk do të marrë pjesë në seancat e Kuvendit dhe se çështjen do ta dërgojë në Gjykatën Kushtetuese. Njëherësh, nuk ishin deputetët nga LDK-ja dhe nga Aleanca.
Albin Kurti prezanton programin qeverisës në Kuvend
Kryeministri Albin Kurti ka mbajtur një fjalim në parlament, përpara se të shkohet në votim për votëbesimin e qeverisë. Ai fillimisht e hapi fjalën me gjyqin e ish-drejtuesve të Ushtrisë Çlirimtare të Kosovës në Hagë. Kurti u shpreh se gjyqi ndaj ish-krerëve të UÇK-së është i padrejtë, pasi Ushtria Çlirimtare e Kosovës ka luftuar për lirinë e vendit.
“Kërkesa e Prokurorisë është e padrejtë dhe e pabesueshme, sepse është në shpërputhje të vërtetës historike të popullit tonë dhe drejtësinë e luftës tonë çlirimtare. Qëndrimi i qeverisë që drejtoi unë është i njëjtë dhe i qartë.
Në Kosovë janë kryer krime kundër njerëzimit, krime lufte dhe gjenocid ndaj popullatës civile shqiptare. Ato i ka kryer regjimi i jugosllavisë së Serbisë nën Millosheviçin. Asnjë gjykatë vendore apo ndërkombëtare nuk mund ta njollosë UÇK-në”, tha Kurti.
Më tej, renditi disa nga arritjet e Kosovës nën qeverisjen e Lëvizjes Vetëvendosje. Kurti nënvizoi se VV-ja qeveris për shumicën e popullsisë dhe jo për pakicën. Sipas tij, në kohën që ka qeverisur Vetëvendosje, ka pasur rritje ekonomike dhe se është bërë më shumë për familjet e Kosovës. “Do kemi shtesa për fëmijët, si dhe për nënat e reja”, tha ai.
Më tej, theksoi se paga mesatare në sektorin privat do të jetë 1000 euro. Kurti premtoi se do të profilizohen universitetet. “Do të profilizojmë universitetet’, u shpreh Kurti. Gjithashtu, u shpreh se shumë shërbime mjekësore do të jenë falas.
Sipas tij, qeveria e re do të sjellë ndryshime në infrastrukturë, sikundër edhe në arsim. Deklaroi se do të mbështeten fermerët, do të rregulohet tregu, do të rritet prodhimi, si dhe do mbështetet bujqësia. Kurti nënvizoi se do të rritet siguria e mirëqenia e qytetarëve të Kosovës.
Kabineti qeveritar:
Zëvendëskryeministër i parë dhe Ministër i Punëve të Jashtme dhe Diasporës, Glauk Konjufca
Zëvendëskryeministre e dytë dhe Ministre e Drejtësisë, Donika Gërvalla
Zëvendëskryeministër i tretë për çështje të pakicave dhe bashkëpunim, Fikrim Damka
Ministër i Financave, Hekuran Murati
Ministër për Punë, Familje dhe Vlerat e Luftës Çlirimtare, Andin Hoti
Ministër i Mbrojtjes, Ejup Maqedonci
Ministër i Punëve të Brendshme, Xhelal Sveçla
Ministër i Administratës Publike dhe Digjitalizimit, Lulëzon Jagxhiu
Ministër i Shëndetësisë, Arben Vitia
Ministër i Arsimit dhe Shkencës, Hajrulla Çeku
Ministër i Kulturës dhe Turizmit, Saranda Bogujevci
Ministër i Sportit dhe Rinisë, Blerim Gashani
Ministër i Administrimit të Pushtetit Lokal, Elbert Krasniqi
Ministre e Mjedisit dhe Planifikimit Hapësinor, Fitore Pacolli
Ministër i Bujqësisë, Pylltarisë dhe Zhvillimit Rural, Armend Muja
Ministër i Infrastrukturës dhe Transportit, Dimal Basha
Ministre e Tregtisë, Industrisë dhe Ndërmarrjes: Mimoza Kusari
Ministre e Ekonomisë, Artane Rizvanolli
Ministër për Komunitete dhe Kthim, Nenad Rashiç
Ministër për Zhvillim Rajonal, Rasim Demiri
