“Mira Murati dëshiron që ju të keni një mundësi zgjedhjeje”. Me këtë fjali, revista prestigjioze TIME nis artikullin kushtuar inxhinieres së njohur me origjinë shqiptare. Emri i saj është rreshtuar mes 100 personave që po udhëheqin revolucionin e Inteligjencës Artificiale në mbarë globin.
Murati nuk është thjesht pjesë e listës, ajo shkëlqen në kopertinën globale të TIME100 AI. Krah saj qëndrojnë titanët e teknologjisë si Sam Altman, Elon Musk, Jeff Bezos, Larry Ellison dhe Ilya Sutskever. Ky vlerësim i lartë e ruan pozicionin e saj si një prej figurave më jetëgjata dhe me peshë në këtë industri, veçanërisht pas kontributit të saj historik si drejtuese e teknologjisë në gjigantin OpenAI.
Për këtë vit, TIME e ka ndarë listën në katër shtylla kryesore: Liderë, Inovatorë, Formësues dhe Mendimtarë. Përzgjedhja shkon përtej laboratorëve të kodimit. Ajo përfshin politikëbërës, sipërmarrës, artistë dhe figura kreative, në një kohë kur Inteligjenca Artificiale po transformon ekonominë, kulturën dhe jetën e përditshme.
Sipas kryeredaktorit të TIME, Sam Jacobs, ky edicion pasqyron një industri “shpërthyese por edhe përçarëse”, ku përplasen interesat gjeopolitike dhe ekonomike. Kjo vihet re edhe nga prania e madhe e liderëve të teknologjisë nga Kina, çka dëshmon për garën e ethshme mes Uashingtonit dhe Pekinit për dominimin e epokës digjitale.
