DURRËS — Gjykata e Durrësit ka rrëzuar kërkesën e Prokurorisë për caktimin e masës së sigurisë ndaj dy protestuesve, Albi Dema dhe Edison Likaj, të cilët u arrestuan pas incidentit me eskortën e kryeministrit Edi Rama në zonën e Manzës.
Trupi gjykues e ka vlerësuar si të paligjshëm arrestimin në flagrancë të dy personave nën hetim dhe ka urdhëruar lirimin e tyre të menjëhershëm nga salla e gjyqit.
Dema dhe Likaj u ndaluan nga Policia të shtunën, pasi dyshohet se morën pjesë në protestën gjatë së cilës u hodhën vezë dhe sende të forta në drejtim të automjeteve të eskortës së kryeministrit.
Vendimi i gjykatës u mor pas zhvillimit të seancës për vlerësimin e masës së sigurisë, ndërsa pranë ambienteve të institucionit të drejtësisë ishin mbledhur edhe të afërm të dy protestuesve në pritje të vendimmarrjes.
