DURRËS- Gjykata e Durrësit ka konfirmuar masën e arrestit me burg për 14-vjeçarin me inicialet M.K., i cili ditën e djeshme plagosi me thikë një 15-vjeçar. 15-vjeçari, i cili mbeti i plagosur është në gjendje kritike, pasi thika e ka kapur në zemër. Prej 48-orësh ndodhet në reanimacion, pasi i është nënshtruar ndërhyrjes kirurgjikale. Gjithashtu jashtë kameras i ati, tha se nuk është momenti për të folur mbi konfliktin, pasi presim të përmirësohet shëndeti i djalit.
“Masë Sigurimi “Vleftesimin e ligjshem te arrestit dhe caktimin e mases se sigurimit ndaj te miturit ne konflikt me ligjin M. K. i dyshuar per kryerjen e veprave penale te parashikuar nga neni 76-22 e 279/2 K.Penal”- Gjyqtar: Elvis Sulejmani- Gjykim datë 27.11.2025 , ora 14:30- Me dyer të mbyllura (për shkak të parashikimeve ligjore në fuqi dhe veçanërisht për shkak të pjesëmarrjes së të miturit në konflikt me ligjin)”, thuhet në njoftimin zyrtar.
Si ndodhi ngjarja?
Një konflikt që dyshohet se nisi në rrjetet sociale mes dy adoleshentëve përfundoi në një përleshje të dhunshme në rrugën “Laguna e Karavastasë”, në zonën e ish-Kënetës në Durrës, ku një 15-vjeçar mbeti i plagosur rëndë. Burime për mediat bëjnë me dije se dy adoleshentët e përfshirë në konflikt u takuan me shokët e tyre për t’u “sqaruar”, por debati i nisur në rrjetet sociale u përshkallëzua në përleshje fizike.
Gjatë sherrit u përdorën sende të forta dhe, sipas policisë, një 14-vjeçar me inicialet M.K. goditi 15-vjeçarin me thikë katër herë, duke i shkaktuar plagë të rënda. Autori i dyshuar është arrestuar menjëherë nga Policia e Durrësit, ndërsa i plagosuri ndodhet në Spitalin Rajonal nën kujdesin e mjekëve, në gjendje të rëndë.
