Kancelari gjerman, Friedrich Merz, ka dërguar një paralajmërim të qartë në drejtim të Shteteve të Bashkuara, duke theksuar se çdo negociatë me Rusinë për konfliktin në Ukrainë duhet të përfshijë domosdoshmërisht edhe partnerët evropianë.
Gjatë fjalës së tij në Bundestag, Merz nënvizoi se Evropa dëshiron t’i japë fund luftës sa më parë, por paralajmëroi se një marrëveshje e arritur mes “fuqive të mëdha” pa pëlqimin e Ukrainës dhe të vetë vendeve evropiane nuk do të siguronte paqe të qëndrueshme.
“Jemi në një moment vendimtar për Ukrainën, për Evropën dhe për aleancën tonë me SHBA-në. Dua të jetë e qartë: çështjet evropiane mund të vendosen vetëm në marrëveshje me Evropën”, deklaroi Merz.
Kancelari shtoi se stabiliteti i kontinentit lidhet drejtpërdrejt me interesat strategjike të Bashkimit Evropian dhe paralajmëroi se çdo zgjidhje e imponuar pa konsensus të plotë rrezikon të minojë arkitekturën e sigurisë evropiane.
