ITALI- Ndarja e parakohshme nga jeta e këngëtarit të njohur Shpat Kasapi, në moshën vetëm 40-vjeçare, ka shkaktuar tronditje të thellë te familjarët, miqtë dhe publiku që e ka ndjekur ndër vite. Mësohet se Kasapi ndodhej në Itali së bashku me bashkëshorten dhe djalin 4-vjeçar, të cilët kishin shkuar për një kontroll mjekësor për të voglin.
Pikërisht aty, në orët e vona të së martës, këngëtari është ndjerë papritur keq dhe ka humbur jetën.
Në një intervistë për Top Channel, vëllai i tij Albini tregoi se ndihma e parë i është dhënë në banesë, por mjekët nuk kanë mundur ta rikthejnë në jetë. Sipas tij, dyshimet e para flasin për një arrest kardiak si shkak të vdekjes tragjike.
I tronditur dhe ende i pabesueshëm ndaj lajmit, Albini tha se familja shpresonte që njoftimi nga Italia të mos ishte i vërtetë, por fatkeqësisht humbja e Shpatit u konfirmua.
Në lidhje me shëndetin e këngëtarit, ai tregoi se Shpati kishte pasur disa shqetësime të lehta nga zemra, por asgjë që të konsiderohej problem serioz.
Aktualisht trupi i tij ndodhet në Itali, ndërsa pritet të kryhen procedurat për sjelljen e tij në Shqipëri, ku familja dhe të afërmit do të mund t’i japin lamtumirën e fundit.
