Elbasan, 9 qershor 2025 – Policia e Elbasanit ka referuar një sërë materialesh procedurale në Prokurori, që lidhen me konflikte fizike, aksidente rrugore, ndërtim pa leje dhe incidente të tjera të ndodhura në qytetet Elbasan, Librazhd, Peqin dhe në disa fshatra përreth.
Një 29-vjeçar me inicialet J. M. është proceduar penalisht pasi ka goditur me grushte një 54-vjeçar, për motive të dobëta. Ngjarja është trajtuar nga specialistët për Hetimin e Krimeve në Komisariatin e Policisë Elbasan.
Po ashtu, në aksin rrugor “Elbasan-Librazhd”, është regjistruar një aksident ku automjeti i drejtuar nga shtetasi M. K., 28 vjeç, është përplasur me dy mjete të tjera që drejtoheshin nga shtetasit M. K., 80 vjeç dhe E. H., 31 vjeç. Si pasojë janë lënduar lehtë drejtuesit dhe katër pasagjerë në një nga automjetet, ndërsa janë dëmtuar edhe ambientet e një lokali.
Në Librazhd, ka nisur procedimi penal ndaj dy shtetasve, O. A., 44 vjeç dhe A. Q., 46 vjeç, të cilët janë konfliktuar fizikisht me sende të forta. Sipas Policisë, shkak i përplasjes janë motive të dobëta.
Ndërkohë, në Peqin është proceduar shtetasi S. Ç., 60 vjeç, pasi u kap duke kryer punime ndërtimi pa leje.
Policia ka dokumentuar edhe disa incidente të datës 7 qershor:
Në fshatin Gostimë, një furgon është djegur në një servis si pasojë e një defekti elektrik. Mjeti i përkiste shtetasit K. P., dhe përveç dëmeve materiale nuk ka pasur të lënduar.
Në aksin “Cërrik-Gramsh”, një shtetas 73-vjeçar me banim në Hollandë, A. V., është rrëzuar aksidentalisht nga biçikleta dhe ndodhet jashtë rrezikut për jetën.
Një 56-vjeçar nga fshati Kabash, R. B., ka kallëzuar humbjen e targave të automjetit të djalit të tij; targat janë shpallur në kërkim.
Në spitalin e Peqinit është paraqitur për mjekim shtetasja D. D., 63 vjeçe, e cila ka marrë djegie në duar gjatë gatimit për shkak të ujit të nxehtë.
Të gjitha materialet për këto ngjarje janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme procedurale.
