Elbasan, 30 maj 2025 – Policia e Elbasanit ka referuar në Prokurori disa raste të veçanta me elementë penalë, për të cilat janë nisur procedime ndaj disa shtetasve të përfshirë në vepra të ndryshme penale.
Sipas njoftimit zyrtar të Drejtorisë Vendore të Policisë Elbasan, Specialistët për Hetimin e Krimeve të Komisariatit të Elbasanit kanë referuar materialet për:
Qemal Q., 69 vjeç, i cili dyshohet se ka kanosur verbalish një 41-vjeçar, shtetasin Lorenc M., për motive të dobëta.
Bashkim H., 56 vjeç, dhe Xhino M., 31 vjeç, të cilët janë kapur në flagrancë duke kryer punime ndërtimi pa leje në pronat e tyre përkatëse.
Dy të mitur 14-vjeçarë, për të cilët dyshohet se kanë kryer veprime të turpshme me një vajzë 12-vjeçare dhe më pas kanë publikuar pamjet në rrjetet sociale.
Materialet procedurale për të tre rastet janë dorëzuar në Prokurorinë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme ligjore. Autoritetet kanë theksuar se hetimet po vijojnë për zbardhjen e plotë të rrethanave të ngjarjeve.
