TIRANË — Kryetari i Bashkisë së Tiranës, Erion Veliaj, ka depozituar një kallëzim penal në Prokurorinë e Tiranës ndaj drejtoreshës së Përgjithshme të Burgjeve, Sadleva Bodo, nën akuzën për shpërdorim detyre. Në padinë e tij, Veliaj pretendon se transferimi nga paraburgimi i Durrësit në atë të Fierit është kryer në mënyrë të paligjshme dhe në kundërshtim me procedurat ligjore, duke kërkuar hetimin e përgjegjësisë së drejtueses së sistemit penitenciar.
Transferimi i kryebashkiakut nga paraburgimi i Durrësit, ku qëndronte prej shkurtit të vitit 2025 pas arrestimit me urdhër të SPAK-ut, drejt institucionit të vuajtjes së dënimit në Fier, u krye më 28 tetor me vendim të Drejtorisë së Përgjithshme të Burgjeve. Përmes reagimeve të mëhershme publike, Veliaj e ka cilësuar këtë lëvizje si një “rrëmbim policor”, me argumentin se nuk ishte njohur paraprakisht me aktin urdhërues dhe as me arsyet e këtij vendimi.
Ndërkohë, Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim në Gjykatën e Posaçme të Shkallës së Parë dosjen penale në ngarkim të tij, e cila përmban 13 akuza ndaj Erion Veliajt dhe 12 akuza ndaj bashkëshortes së tij, Ajola Xoxa.
Sipas hetimeve paraprake të SPAK-ut, Veliaj dhe Xoxa, në bashkëpunim me njëri-tjetrin, dyshohet se në 9 raste të veçanta kanë marrë përfitime të parregullta në forma monetare dhe pasuri të paluajtshme nga subjekte tregtare dhe organizata jofitimprurëse, të cilat kanë marrë leje ndërtimi dhe fonde publike nga Bashkia e Tiranës. Hetuesit kanë dokumentuar se fondet e miratuara me firmën e kryebashkiakut kanë përfunduar tek OJF-të e kontrolluara nga bashkëshortja e tij dhe rrethi i tyre i afërt, duke konsumuar elementët e veprave penale të korrupsionit aktiv dhe pasiv të parashikuara në nenet 245 dhe 260 të Kodit Penal.
