TIRANA- Partia Demokratike ka reaguar pas publikimit të letrës së Erion Veliajt nga burgu, ku ky i fundit pretendon se kryeministri Edi Rama i ka përcjellë, përmes ministrit të Drejtësisë Toni Gogu, një ultimatum për dorëzimin e drejtimit të Bashkisë së Tiranës.
Në deklaratën e saj, PD e cilëson ngjarjen si një akt shantazhi dhe kërkon nisjen e një hetimi urgjent ndaj Edi Ramës, Toni Gogut dhe Arbër Hajdarit. Sipas versionit të paraqitur nga Veliaj në letrën e tij, pas transferimit në burgun e Fierit, ministri Gogu e ka takuar në qeli dhe i ka komunikuar kërkesën që të heqë dorë nga drejtimi i Bashkisë së Tiranës.
PD pretendon se këto zhvillime përbëjnë një kërcënim serioz për sigurinë e Veliajt në burgun e Fierit dhe akuzon kryeministrin për përdorimin e presionit ndaj tij. Në reagim, demokratët shprehen gjithashtu se çështja ngre pikëpyetje mbi përdorimin e institucioneve të drejtësisë në përplasjet brenda mazhorancës, duke kërkuar që përgjegjësit të dalin përpara hetimit.
Partia Demokratike e cilëson të papranueshme atë që e quan shantazh ndaj një personi në paraburgim dhe kërkon zbardhjen e plotë të rrethanave të takimit, si dhe hetimin e rolit të Ramës, Gogut në këtë çështje.
Deklaratë e Partisë Demokratike
Sot mediat publikuan letrën nga burgu të Erion Veliajt, në të cilën ai shkruan se, pas transferimit në burgun e Fierit, Edi Rama i ka dërguar atij në qeli Ministrin e Drejtësisë, Toni Gogu, dhe i ka kërkuar të dorëzojë bashkinë te hajduti i damkosur Arbër Hajdari, ose të përballet me 100 vjet burg për prishje të rendit kushtetues dhe financim të ‘Flamingove’.
Partia Demokratike e Shqipërisë deklaron se:
Kërcënimet mafioze ndaj të burgosurit Erion Veliaj janë dëshmi e fytyrës së vërtetë prej kreu të organizatës kriminale (padrino) të Edi Ramës.
Kërcënimi mafioz i të burgosurit Erion Veliaj nga kreu i organizatës kriminale, Edvin Kristaq Xhelati, dëshmon se jeta e të burgosurit Erion Veliaj në burgun e Fierit është në rrezik tejet serioz.
Ky akt skandaloz dëshmon se SPAK-u nuk po përdoret më si kërbaç vetëm për opozitën dhe mburojë për të korruptuarit, por, më keq akoma, si instrument shantazhi i luftës brenda llojit të bandës në pushtet.
Partia Demokratike dënon me forcën më të madhe kërcënimin në qeli të të burgosurit Erion Veliaj dhe kërkon hetim urgjent për këtë akt kriminal të Edi Ramës, Toni Gogut, si dhe të hajdutit të damkosur Arbër Hajdari, që kërkon të marrë në rrugë antiligjore dhe antikushtetuese Bashkinë e Tiranës.
