IRKUTSK — Vdekja e një laboranteje 28-vjeçare në Institutin e Kërkimeve Kundër Murtajës në Irkutsk ka ngritur alarm në Siberi, ku autoritetet shëndetësore kanë vendosur nën vëzhgim mjekësor rreth 200 persona që kanë pasur kontakt me të.
E reja, e identifikuar si Daria Shipilova, ndërroi jetë më 2 tetor në spitalin rajonal të Shelekhovit, pasi u shtrua më 29 shtator me komplikacione të rënda pulmonare dhe u intubua.
Raportimet e mediave lokale dhe kanaleve në Telegram pretenduan se ajo mund të ishte infektuar pas thyerjes së një epruvete me bakterin Yersinia pestis, shkaktarin e murtajës pneumonike. Megjithatë, autoriteti sanitar rus Rospotrebnadzor i hodhi poshtë këto versione, duke deklaruar se diagnoza zyrtare është “pneumoni me etiologji të paspecifikuar” dhe se analizat nuk zbuluan patogjenë të lidhur me aktivitetin e saj profesional.
Pavarësisht mohimeve zyrtare, spitali në Shelekhov u përfshi nga masat e karantinës, ndërsa drejtuesja e Rospotrebnadzor, Anna Popova, udhëtoi me urgjencë drejt Siberisë për të drejtuar komisionin sanitaro-epidemiologjik.
Organizata Botërore e Shëndetësisë (OBSH) e vlerëson aktualisht rrezikun për shëndetin publik si të ulët, ndërsa autoritetet ruse konfirmojnë se deri më tani nuk ka raste të tjera të dyshuara dhe se situata epidemiologjike mbetet nën kontroll.
