Një situatë e rënduar nga zjarret është krijuar në disa zona të Fierit, ku një vatër e nisur mesditën e së premtes në fshatin Vadhizë është përhapur me shpejtësi drejt Levanit dhe zonave përreth.
Sipas raportimeve nga terreni, flakët kanë përfshirë sipërfaqe të mëdha me ullishte, pyje me pisha dhe shkurre, ndërsa janë dëmtuar edhe banesa e ambiente biznesi.
Banorët raportojnë se nga zjarri janë djegur tre shtëpi dhe një magazinë ku prodhoheshin koshere bletësh. Në zonën e Qafës së Koshovicës, flakët u janë afruar gjithashtu disa bizneseve.
Situata është përkeqësuar nga era e fortë dhe temperaturat e larta, të cilat kanë favorizuar përhapjen e shpejtë të zjarrit dhe kanë vështirësuar ndërhyrjen e forcave zjarrfikëse nga toka.
Në zonën e Qafës së Koshovicës është raportuar edhe djegia e një lokali dhe e një banese të pabanuar. Për përballimin e situatës është kërkuar ndërhyrja nga ajri, ndërsa në terren kanë mbërritur dy helikopterë për të goditur vatrat më problematike.
Bllokohet përkohësisht aksi Fier–Levan
Flakët kanë kaluar edhe në zonën e rrugës nacionale Fier–Levan, duke detyruar policinë të bllokojë përkohësisht qarkullimin për shkak të rrezikut dhe tymit të dendur.
Zjarri ka vijuar përhapjen përmes zonave me bimësi të dendur, duke avancuar në drejtim të Peshtanit të Vogël.
Për shkak të afrimit të flakëve pranë zonave të banuara, policia ka nisur evakuimin e banorëve. Rreth 15 familje janë larguar nga banesat e tyre, ndërsa efektivët po monitorojnë zonat ku paraqitet rrezik për banesat dhe pronat.
Forca nga disa qarqe në terren
Situata është komplikuar edhe nga krijimi i disa vatrave të tjera zjarri. Në terren vijojnë operacionin forca të shumta zjarrfikëse nga Fieri, Mallakastra, Lushnja, Vlora dhe Berati, në bashkëpunim me policinë dhe strukturat e emergjencave civile.
Operacioni për shuarjen e flakëve vijon, ndërsa situata mbetet e vështirë për shkak të erës, e cila favorizon përhapjen e zjarrit drejt zonave të tjera.
Autoritetet vijojnë të monitorojnë situatën, ndërsa prioritet mbetet mbrojtja e banorëve dhe e zonave të banuara nga përparimi i flakëve.
