Tronditet Mali i Zi. Tre persona janë ekzekutuar me armë zjarri në një poligon qitjeje në Danilovgrad. Policia e vendit fqinj thotë se është vënë në kërkim të një 30-vjeçari rus, i cili dyshohet si autori i krimit makabër.
Viktimat janë identifikuar si Petar Globareviç, 24 vjeç, dhe Nemanja Kapor, 20 vjeç, të dy nga Podgorica, si dhe Momir Radonjiç, 67 vjeç, nga Danilovgradi.
Tronditet Mali i Zi, 30-vjeçari rus vret tre të rinj në
Mediat në Mal të Zi raportojnë se Policia po verifikon gjithashtu nëse i dyshuari është larguar nga vendi i ngjarjes me një automjet tip “Seat Cordoba”, i cili rezulton të jetë në pronësi të babait të njërit prej viktimave.
Forcat e rendit po vijojnë kërkimet intensive për lokalizimin dhe arrestimin e të dyshuarit, i cili konsiderohet i armatosur.
Përmasat e operacionit janë të mëdha. Në kërkimin e të dyshuarit janë angazhuar Njësia Speciale dhe njësitë e posaçme të Policisë së Malit të Zi, ndërsa janë vendosur bllokada në zona të ndryshme. Automjetet që lëvizin nga Danillovgradi drejt Podgoricës po ndalohen dhe kontrollohen nga policia.
Policia u ka bërë thirrje qytetarëve që të mos afrohen pranë të dyshuarit dhe, nëse kanë informacion për vendndodhjen apo lëvizjet e tij, ta raportojnë menjëherë në numrin 122.
Autoritetet kanë paralajmëruar gjithashtu qytetarët që të qëndrojnë në shtëpitë e tyre ndërsa vijon operacioni për kapjen e personit të dyshuar për vrasjen e trefishtë.
