ELBASAN — Një ngjarje e rëndë ka tronditur opinionin publik, pasi 37-vjeçarja shtatzënë që ndërroi jetë ditën e djeshme teksa transportohej me ambulancë drejt Tiranës ka shkaktuar edhe një humbje tjetër tragjike: gjatë urgjencës mjekësore, ka ndërruar jetë edhe foshnja e saj 7-muajshe që mbante në bark.
Gruaja ishte paraqitur fillimisht në Spitalin e Pogradecit për shkak të komplikacioneve të rënda shëndetësore. Pas ekzaminimeve dhe konsultave mjekësore, stafi i spitalit kishte vendosur transferimin e saj urgjent drejt kryeqytetit për të marrë trajtim të specializuar.
Gjatë rrugës, në afërsi të qytetit të Elbasanit, gjendja shëndetësore e 37-vjeçares u përkeqësuar ndjeshëm, duke sjellë vdekjen e saj dhe të foshnjës para se të mbërrinin në spital. Sipas të dhënave paraprake, dyshohet se ngjarja mund të jetë shkaktuar nga një hemorragji e brendshme masive, ndërsa shkaqet e sakta mbeten për t’u përcaktuar zyrtarisht nga ekspertiza mjeko-ligjore dhe veprimet procedurale tashmë të nisura nga autoritetet.
