Një grabitje e pretenduar për miliona euro përfundoi për njërin prej tre autorëve me burgim të përjetshëm, vendim i cili ende nuk është i formës së prerë. Dy bashkëpunëtorët e tij u dënuan me nga katër vjet burg, vendime tashmë të formës së prerë.
MEIN BEZIRK
Gati një vit pas ngjarjes, Gjykata e Jurisë ka dhënë vendimin ndaj tre burrave që hynë me forcë në shtëpinë e një çifti nga Amstetten të Austrisë. Autorët synonin të vidhnin 1,5 milionë euro, por ato para nuk ndodheshin kurrë në shtëpi.
Banorja e shtëpisë, një pensioniste, i surprizoi hajdutët. Megjithatë, ata nuk u larguan, por vazhduan planin e tyre. Njëri prej tyre e mbajti gruan nën kërcënim, ndërsa dy të tjerët vazhduan të kërkonin para dhe sende me vlerë.
Dy kosovarët dhe shqiptari u larguan vetëm kur, rastësisht, ra zilja e derës.
Gjatë arratisjes, njëri prej tyre, atëherë 58 vjeç, u përfshi në një shkëmbim zjarri me dy policë. Ai dhe njëri prej bashkëpunëtorëve u arrestuan po atë ditë. I treti arriti të arratisej për momentin, por policia e gjeti disa ditë më vonë. Që prej atëherë, të tre ndodheshin në paraburgim.
U sekuestrua një çantë
Pjesa më e madhe e procesit të provave kishte përfunduar që në seancën e parë gjyqësore, në shkurt. Ndërkohë, hetuesit arritën të sekuestronin një çantë sportive.
Çanta i përkiste të pandehurit të tretë dhe brenda saj u gjetën mjete të ndryshme për vjedhje, radio komunikimi, shirit ngjitës dhe targa automjetesh.
Prokuroria i interpretoi këto materiale si tregues se grabitja ishte planifikuar me kujdes paraprakisht. Shiritin ngjitës, për shembull, autorët mund ta përdornin për të lidhur personat që mund të ndodheshin në shtëpi.
Grabitje apo vjedhje me thyerje?
Të tre të pandehurit pranuan se ishin fajtorë për vjedhje me thyerje. Megjithatë, prokuroria i akuzoi për grabitje të rëndë.
Dallimi është i rëndësishëm: në rastin e një vjedhjeje, autori i merr një personi diçka që i përket atij. Grabitja, nga ana tjetër, nënkupton që autori përdor dhunë ose kërcënon një person për t’i marrë pasurinë.
Grabitja dënohet me një deri në dhjetë vjet burg. Nëse grabitja kryhet me përdorimin e një arme, siç ishte pretenduar në këtë rast, dënimi mund të jetë nga një deri në 15 vjet burg.
Në rastin e një vjedhjeje me thyerje në një banesë, dënimi maksimal është pesë vjet burg.
Banorja mbeti e traumatizuar
Anëtarët e jurisë duhet të vendosnin se sipas cilit nen të ligjit duhej të dënoheshin tre burrat.
Si prokuroria, ashtu edhe mbrojtja u përpoqën t’i bindnin ata gjatë fjalimeve përfundimtare.
Sipas prokurorit, bëhej fjalë për kriminalitet shumë të rëndë. Tre të pandehurit e kishin planifikuar me kujdes veprën dhe kishin ndarë paraprakisht detyrat mes tyre.
Me një levë hekuri dhe lidhëse plastike, ata kishin kërcënuar pensionisten dhe e kishin futur në një gjendje terrori, duke e bërë të besonte se jeta e saj ishte në rrezik.
Që prej incidentit, pronarja e shtëpisë vuan nga çrregullimi i stresit post-traumatik (PTSD).
Dhuna u mohua si qëllim
Sipas avokatëve të tyre, të pandehurit nuk kishin ndërmend t’i ushtronin dhunë gruas. I pandehuri i dytë kishte me vete një pistoletë, por ajo nuk ishte e mbushur. Për më tepër, vjedhja nuk kishte përfunduar me sukses, pasi në vend që të merrnin 1,5 milionë euro, ata u larguan duarbosh.
Të shtënat ndaj policëve
Prokuroria e akuzoi gjithashtu të pandehurin e dytë për vrasje të mbetur në tentativë.
Pas arratisjes nga prona, dy policë e ndoqën. Ai qëlloi të paktën tre herë, nga një distancë prej 11,5 deri në 12,5 metrash. Policët nuk u goditën.
Sipas shqiptarit, ai kishte qëlluar në ajër. Megjithatë, një ekspertizë paraqiti prova kontradiktore. Gjurmët e barutit dhe një vrimë plumbi në një pemë sugjeronin më tepër se 58-vjeçari kishte qëlluar në drejtim të policëve.
Përfaqësuesja ligjore e dy policëve, e përfshirë në proces si palë private, e quajti këtë një “llogaritje të ftohtë kosto-përfitim”. Sipas saj, shqiptari kishte qenë edhe më parë në një situatë të ngjashme, ku kishte arritur të qëllonte për t’u shpëtuar policëve dhe të shmangte arrestimin, të paktën përkohësisht. Viktima e atij rasti kishte vdekur më vonë nga plagët e plumbave. Për këtë ngjarje, shqiptari ishte dënuar më parë për vrasje me 18 vjet burg.
Vendimet e jurisë ishin unanime
Tetë anëtarët e jurisë iu përgjigjën njëzëri të gjitha pyetjeve mbi fajësinë.
Ata i shpallën të tre të pandehurit fajtorë për grabitje, por jo për grabitje të rëndë me përdorimin e armës. Sipas jurisë, pistoleta dhe leva e hekurit nuk ishin përdorur si armë gjatë grabitjes dhe pensionistja nuk ishte kërcënuar me to.
Dy kosovarët, të cilët më parë nuk kishin precedent penal, u dënuan me nga katër vjet burg. Këto vendime janë të formës së prerë.
Edhe shqiptari u shpall njëzëri fajtor për dy tentativa vrasjeje dhe mbajtje të paligjshme të armës. Duke marrë parasysh bashkimin e disa veprave penale dhe dënimin e tij të mëparshëm për vrasje, gjykata e dënoi me burgim të përjetshëm.
Ky vendim nuk është ende i formës së prerë, pasi i pandehuri i dytë ka bërë apel lidhur me masën e dënimit.
Dëmshpërblimet
Gjykata i akordoi pensionistes 7.050 euro dëmshpërblim për dhimbjet dhe vuajtjet nga të tre të dënuarit.
Dy policëve ndaj të cilëve kishte qëlluar shqiptari, gjykata u dha nga 5.000 euro secilit, për pasojat psikologjike të ngjarjes.
Ndërkohë, paratë cash të sekuestruara nga të pandehurit, në shumën totale prej rreth 8.500 euro, do të ndahen proporcionalisht për të mbuluar këto dëmshpërblime.
