VERMOSH, 10 Tetor 2026 — Mbrojtësi i Kombëtares Shqiptare të futbollit, Mario Mitaj, është bërë protagonist i një akti të lartë solidariteti njerëzor, duke iu ardhur në ndihmë familjes Prelocaj nga Vermoshi i Malësisë së Madhe, e cila po përballet me vështirësi të rënda ekonomike dhe shëndetësore.
Familja nga veriu i vendit po kalon një periudhë me dhimbje të madhe pas humbjes së djalit të vetëm, i cili u nda nga jeta si pasojë e një sëmundjeje të rëndë. Pasi u njoh me historinë e tyre dhe me gjendjen e vështirë ku ndodhen nëna dhe tri motrat e të ndjerit, futbollisti shqiptar reagoi menjëherë duke kontribuar me një shumë prej 5 mijë dollarësh përmes platformës online GoFundMe.
Ky veprim i mbrojtësit të kuqezinjve ka marrë vëmendje dhe vlerësime të shumta, duke dëshmuar se përtej fushës së blertë dhe arritjeve sportive, solidariteti dhe mbështetja për njerëzit në ditët e tyre më të vështira mbeten vlera thelbësore.
