TIRANA- Kryeministri i vendit, Edi Rama ka zhvilluar ditën e sotme një takim në Berat për të diskutuar me banorët në lidhje me reformen e re territoriale. Pas takimit i cilu u shoqërua me tensione, përmes një postimi në rrjetin social Facebook kryeministri u shpreh se Poliçani dhe Dimali nuk humbasin shërbimet, por do të ndryshojë vetëm drejtimi vendor.
Më tej, lideri i qeverisë shtoi se Poliçani dhe Dimali do të kenë drejtuesin e tyre dhe do të kenë këshilltarët e tyre në Këshillin Bashkiak të bashkisë Berat, me kuota. Rama theksoi se ndryshimi kryesor lidhet me mënyrën e drejtimit vendor, pasi Poliçani dhe Dimali nuk do të kenë më kryetarë bashkie të zgjedhur më vete.
Kryeministri Rama: Më thoni çfarë mendoni ju se do të dëmtohet në rast se do të bëhet bashki. Kur më thua rruga, e më thua shërbimi, këto nuk ndryshojnë. Nuk do të ikin shërbimet nga Poliçani, nga Dimali ose nga askund. Përkundrazi, këto nuk ndryshojnë. Në raport me çfarë keni, ndryshon vetëm një gjë; nuk do të keni kryetar bashkie të zgjedhur.
Nuk ndryshon godina, nuk ndryshon stafi, nuk ndryshon numri i shërbimeve që bëhen, në kuptimin nuk ulet, se duhet shtuar. Ti thua distanca? Ça lidhje ka distanca? Ato shërbime që ti merr sot në Poliçan ose në Dimal, do t’i marrësh po aty. Pra, bashki, qytet, njësi administrative. Dhe qyteti Poliçan, qyteti Dimal do të kenë drejtuesin e tyre, do të kenë këshilltarët e tyre në Këshillin Bashkiak të bashkisë Berat, me kuota.
Më thoni dhe një gjë tjetër, komunat janë më mirë sot apo ishin më mirë kur ishin veç, se këto biseda unë i kam dëgjuar “mot a mot” në kohën e reformës 2015; “do na ikë kjo, do na ikë ajo; jo distanca; ohu, sa larg është Poliçani, ne jemi këtu te komuna jonë; sa larg është qendra e Urës, ne jemi te komuna jonë; ne kemi këtë, kemi atë, kemi kryetarin e komunës…
Ndodhi ndonjë gjë e kësaj natyre? A janë sot, a kanë marrë më shumë investime komunat se ç’bënin më përpara apo kanë marrë më pak? Investimet e komunave nga iu erdhën? Nga vetja? Iu erdhën nga bashkimi./
