Pallati i Kulturës “Sadi Halili” në Librazhd është vlerësuar me Çmimin e Mirënjohjes në Festivalin Folklorik Mbarëshqiptar “Këngë Jeho”, një prej aktiviteteve më të rëndësishme kushtuar ruajtjes dhe promovimit të folklorit shqiptar, që zhvillohet tradicionalisht në Strugë.
Ky vlerësim vjen si rezultat i angazhimit të vazhdueshëm të artistëve, drejtuesve artistikë dhe të gjithë ansamblit në ruajtjen, kultivimin dhe promovimin e trashëgimisë kulturore shqiptare. Përmes interpretimit të këngëve dhe valleve tradicionale, Pallati i Kulturës “Sadi Halili” vijon të përfaqësojë me dinjitet vlerat folklorike të Librazhdit në aktivitete kombëtare dhe mbarëshqiptare.
Përfaqësimi në Festivalin “Këngë Jeho” dhe marrja e këtij çmimi përbëjnë një vlerësim të rëndësishëm për punën shumëvjeçare në shërbim të kulturës dhe traditës, duke e renditur edhe një herë Librazhdin mes zonave që kontribuojnë në ruajtjen dhe pasurimin e identitetit kulturor shqiptar.
Çmimi i Mirënjohjes është një motivim për të vijuar punën në promovimin e folklorit dhe trashëgimisë shpirtërore, duke i përcjellë këto vlera te brezat e rinj dhe duke i bërë ato pjesë të aktiviteteve kulturore brenda dhe jashtë vendit.
