TIRANË – Tentativa për vrasjen e Miri Bitocit në një lokal në Elbasan nuk do të ishte ngjarja e parë e dhunshme mes autorit të dyshuar, Poli Boriçi, dhe familjes Bitoci.
Sipas të dhënave të siguruara, historia mes dy familjeve daton në vitin 2008, kur Poli Boriçi plagosi Luan Bitocin, vëllain e Miri Bitocit. Pavarësisht kalimit të viteve, motivi i saktë i asaj ngjarjeje nuk është bërë i ditur.
Çfarë ndodhi në vitin 2008?
Pas plagosjes së Luan Bitocit, familjarë të Boriçit kanë ndërhyrë për të qetësuar situatën. Sipas burimeve, vëllai i Polit ka kontaktuar familjen Bitoci dhe u ka kërkuar falje për ngjarjen, duke e lidhur atë me problemet e shëndetit mendor që, sipas familjarëve, kishte autori.
Familja Bitoci ka pranuar ta falë dhe konflikti nuk është përshkallëzuar më tej. Për plagosjen, Boriçi ka vuajtur rreth gjashtë muaj burgim dhe më pas është liruar.
Tentativa e dytë, 17 vite më vonë
Pasditen e djeshme, historia është rikthyer në vëmendje pas përplasjes së ndodhur në një lokal në Elbasan. Sipas burimeve të dosjes, Boriçi ndodhej në të njëjtin ambient me Miri Bitocin, kur ka nxjerrë armën dhe ka qëlluar në drejtim të tij, në një tentativë që dyshohet se kishte për qëllim vrasjen.
Burimet pranë familjes Bitoci bëjnë me dije se Boriçi kishte rreth një javë që ishte kthyer në Shqipëri, pasi jetonte jashtë vendit.
Në armën që dyshohet se mbante me vete, sipas burimeve të dosjes, kishte nëntë fishekë në karikator.
Dëshmia në Polici
Një tjetër element i rëndësishëm i hetimit është dëshmia që Boriçi ka dhënë para policisë pas ngjarjes.
Sipas burimeve, ai ka deklaruar se kishte parë disa automjete me xhama të zinj dhe se më pas kishte menduar se i ishte kërkuar nga Allahu që të vriste Miri Bitocin.
“Ju më keni ardhur me 200 makina me xhama të zinj. Unë i shihja nga dritarja dhe më tha Allahu që ta vrisja”, mësohet të ketë deklaruar Boriçi para efektivëve të Policisë.
Deri në këto momente, hetuesit nuk kanë bërë publike një motiv të konfirmuar për konfliktin. Dyshimet e ngritura në lidhje me gjendjen e tij mendore mbeten pjesë e verifikimeve dhe nuk përbëjnë një konstatim përfundimtar mjekësor apo ligjor.
Ngjarja e fundit ka rikthyer në hetim edhe episodin e vitit 2008, ndërsa autoritetet po vijojnë punën për të dokumentuar rrethanat e plota të tentativës së vrasjes dhe motivin që qëndron pas saj.
