Policia e Nju Jorkut ka nisur një hetim mbi një seri incidentesh të pazakonta që kanë ngritur pikëpyetje mes banorëve dhe autoriteteve, pasi disa grupe njerëzish janë filmuar duke dalë nga pusetat e sistemit të kanalizimeve në lagje të ndryshme të qytetit gjatë natës.
Hetimi u nxit nga videot e publikuara në rrjetet sociale, të cilat tregojnë persona që hyjnë dhe dalin nga rrjeti i kanalizimeve në orët e vona. Sipas Departamentit të Policisë së Nju Jorkut (NYPD), oficerë të Njësisë së Shërbimeve të Emergjencave, të trajnuar për operacione në sistemin e kanalizimeve, kontrolluan zonat për të verifikuar nëse ekzistonte ndonjë kërcënim për sigurinë publike.
“Nuk u gjet asgjë e dyshimtë apo e rrezikshme,” deklaroi policia, duke shtuar se edhe Departamenti i Mbrojtjes së Mjedisit, i cili administron rrjetin e kanalizimeve, nuk konstatoi dëmtime në infrastrukturë.
Pas Francës dhe Australisë, Suedia planifikon të ndalojë rrjetet sociale për të miturit nën 15 vjeç
Deri më tani nuk janë raportuar arrestime apo persona të lënduar.
Një zyrtar i lartë i zbatimit të ligjit tha për NBC News se një nga teoritë që po shqyrtohet është se personat mund të kenë hyrë në kanalizime në kërkim të sendeve me vlerë që përfundojnë në rrjetin e ujërave të zeza.
Rasti i parë u raportua javën e kaluar në lagjen Gravesend të Brooklynit, kur një dëshmitar pa tetë persona duke hequr kapakun e një pusete rreth orës 23:00. Sipas policisë, grupi u pa sërish rreth tre orë më vonë duke dalë nga kanalizimet dhe duke ndërruar rrobat pranë disa automjeteve të parkuara.
Një tjetër incident u regjistrua në Williamsburg, gjithashtu në Brooklyn, ku disa persona u panë duke hyrë në një pusete dhe duke dalë pas më shumë se dy orësh. Pamjet filmike tregojnë shtatë persona që dalin nga nëntoka, ndërsa personi i fundit mbyll kapakun e pusit përpara largimit.
Ngjarje të ngjashme ishin raportuar edhe më 5 maj në Astoria të Queens-it. Një banor i zonës tha për NBC New York se pa tre persona të veshur me rroba të pazakonta që hapën pusetën dhe hynë brenda.
“Ishte si të shihje Breshkat Ninja,” tha dëshmitari Aki Jakupovic, duke shtuar se burrat mbanin fenerë dhe pajisje mbrojtëse nga uji.
Autoritetet ende nuk kanë konfirmuar nëse incidentet janë të lidhura mes tyre, ndërsa hetimet vijojnë për të zbuluar qëllimin e hyrjeve të përsëritura në sistemin e kanalizimeve të qytetit.
