TIRANA- Prokuroria e Posaçme kundër Korrupsionit dhe Krimit të Organizuar (SPAK) ka depozituar në gjykatë Zyra Islamaj, ish-kryetaren e komanduar të Bashkisë së Tropojës, dhe ndërtuesin Rrok Gega, për procedim penal.
Islamaj akuzohet se ka ndikuar tek ndërtuesi në mënyrë që të ndërtohej një urë mbi përroin që kalon pranë shtëpisë së motrës së saj, duke favorizuar interesin personal. Kërkesa për gjykim u pranua nga Gjykata e Posaçme Kundër Korrupsionit dhe Krimit të Organizuar (GJKKO), ndërsa ditën e djeshme u zhvillua edhe seanca paraprake.
Në seancën paraprake të 25 nëntorit 2025, trupi gjykues i kryesuar nga gjyqtarja Irena Gjoka shqyrtoi pretendimet e palëve dhe, me vendimin nr. 149, vendosi:
– Pranimin e kërkesës së SPAK për dërgimin e çështjes në gjyq në ngarkim të dy të pandehurve Rrok Gega dhe Zyra Islamaj;
– Dërgimin e dosjes për shqyrtim te një trup tjetër gjykues i Gjykatës së Posaçme;
– Përfshirjen në fashikullin gjyqësor të të gjitha akteve të hetimit paraprak, me përjashtim të deklarimeve të personave që kanë dijeni për rrethanat e ngjarjes;
– Pavlefshmërinë e ankimit, pasi kundër këtij vendimi nuk lejohet apelim.
Sipas hetimeve të kryera nga SPAK, Zyra Islamaj, ndërsa ishte në detyrën e kryetares së Bashkisë Tropojë, ka tentuar të favorizojë familjarët e saj përmes një tenderi të hapur.
Hetuesit thonë se ajo ka ndikuar tek ndërtuesi Rrok Gega për të ngritur një urë mbi përroin që kalon pranë shtëpisë së motrës së saj, duke përfituar për interes personal.
Njoftimi:
Prokuroria e Posaçme kundër Korrupsionit dhe Krimit të Organizuar me datë 29.09.2025 ka paraqitur pranë Gjykatës kërkesën me objekt: “Dërgimin në gjyq të çështjes penale me nr. 15/2026, në ngarkim të të pandehurve: Rrok Gega, akuzuar për kryerjen e veprës penale “Korrupsioni aktiv i personave që ushtrojnë funksione publike”, parashikuar nga neni 244/2 i Kodit Penal dhe Zyra Islamaj, akuzuar për kryerjen e veprës penale “Korrupsioni pasiv i personave që ushtrojnë funksione publike”, parashikuar nga neni 259/2 i Kodit Penal”.
2. Në seancën e datës 25.11.2025 (seanca paraprake), Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarja Irena Gjoka, pasi shqyrtoi pretendimet e palëve, bazuar në nenet 112, 332/dh, pika 1, gërma “a”, 332/ë, 332/gj, pika 1 të K.Pr.Penale, me vendimin nr. 149, datë 25.11.2025, vendosi:
I. Pranimin e kërkesës së palës kërkuese, Prokuroria e Posaçme kundër Korrupsionit dhe Krimit të Organizuar për dërgimin në gjyq të çështjes penale që i përket procedimit penal nr.15, viti 2025 në ngarkim të të pandehurve:
1. Rrok Gega, akuzuar për kryerjen e veprës penale “Korrupsioni aktiv i personave që ushtrojnë funksione publike“, parashikuar nga neni 244, paragrafi i dytë i Kodit Penal.
2. Zyra Islamaj, akuzuar për kryerjen e veprës penrrok ale “Korrupsioni pasiv i personave që ushtrojnë funksione publike“, parashikuar nga neni 259, paragrafi i dytë i Kodit Penal.
II. Dërgimin e çështjes për gjykim pranë Gjykatës së Posaçme të Shkallës së Parë për Korrupsionin dhe Krimin e Organizuar, me tjetër trup gjykues.
III. Fashikulli i gjykimit do të përmbajë të gjitha aktet e hetimit paraprak, të përfshira në 1 volum hetimor (përveç deklarimeve të shtetasve të pyetur me cilësinë e personave që kanë dijeni për rrethanat e ngjarjes).
IV. Kundër këtij vendimi nuk lejohet ankim./
