Shqipëria e ka mbyllur me fitore përballjen me San Marinon, por tri pikët erdhën pas një drame të vërtetë në “Arenën Kombëtare”. Kristjan Asllani ishte heroi i mbrëmjes, duke shënuar dy herë, fillimisht me një supergol dhe më pas nga pika e bardhë në minutën e 91-të.
Kuqezinjtë e nisën ndeshjen në mënyrën më të mirë të mundshme. Në minutën e 11-të, Asllani mori topin jashtë zonës dhe lëshoi një goditje spektakolare, duke mposhtur portierin e San Marinos dhe duke i dhënë Shqipërisë avantazhin.
Por ajo që dukej si një tjetër fitore e qetë ndaj San Marinos u shndërrua në një mbrëmje shumë më të komplikuar.
Në pjesën e dytë, San Marino gjeti golin e barazimit dhe i dha një tjetër dimension historisë së kësaj përballjeje. Ishte goli i parë që San Marino i shënonte Shqipërisë në historinë e përballjeve mes dy kombëtareve.
Deri në këtë ndeshje, Shqipëria i kishte fituar të gjitha pesë përballjet me San Marinon, me një bilanc mbresëlënës prej 16 golash të shënuar dhe asnjë të pësuar. Në Serravalle, vetëm pak ditë më parë, kuqezinjtë kishin fituar 3-0.
Kësaj here, historia dukej se po ndryshonte.
Shqipëria kërkoi golin e fitores deri në fund dhe shpërblimi erdhi në kohën shtesë. Në minutën e 91-të, kuqezinjtë fituan një penallti dhe sërish ishte Kristjan Asllani ai që mori përgjegjësinë.
Mesfushori nuk gaboi. Goditje e saktë nga pika e bardhë dhe 2-1 për Shqipërinë.
Një fitore e vuajtur, që e shpëtoi Shqipërinë nga një barazim që do të ishte një rezultat i rëndë përballë San Marinos, por që në fund sjell tri pikët.
Dhe lajmi i madh erdhi edhe nga ndeshja tjetër e grupit.
Bjellorusia mposhti Finlandën në shtëpi, duke i dhënë Shqipërisë mundësinë për ta mbyllur këtë fushatë në krye të grupit. Kuqezinjtë tani kanë në dorë një mundësi të artë për të synuar vendin e parë në ndeshjen e fundit.
Një natë që nisi me një supergol të Asllanit, kaloi në një moment historik me golin e parë të San Marinos ndaj Shqipërisë dhe përfundoi sërish me Asllanin në qendër të festës./
