Në Cërrik, projekti “Zëri im, politika ime” vijoi me një bashkëbisedim mes të rinjve dhe përfaqësuesve të pushtetit vendor, duke krijuar një hapësirë të drejtpërdrejtë ku të rinjtë mundën të ndajnë problematikat dhe çështjet që i shqetësojnë.
Gjatë takimit, të rinjtë folën për nevojat dhe sfidat me të cilat përballen në përditshmërinë e tyre, duke sjellë në vëmendje çështje që lidhen me jetën në komunitet, mundësitë për zhvillimin e tyre dhe hapësirat që kanë në dispozicion për aktivitete sociale, sportive, kulturore dhe edukative.
Bashkëbisedimi u zhvillua në një atmosferë të hapur, ku të rinjtë patën mundësinë të shprehen lirshëm, të ndajnë idetë e tyre dhe të kërkojnë vëmendje më të madhe nga institucionet vendore për problematikat që prekin drejtpërdrejt jetën e tyre.
Përfaqësuesit e pushtetit vendor dëgjuan kërkesat e të rinjve dhe diskutuan me ta mbi mundësitë për adresimin e çështjeve të ngritura, duke theksuar rëndësinë e një komunikimi të vazhdueshëm mes institucioneve dhe komunitetit rinor.
Takime të tilla janë të rëndësishme për ta kthyer pjesëmarrjen e të rinjve nga një proces formal në një mundësi reale për të ndikuar në vendimmarrjen lokale. Të rinjtë kanë nevojë jo vetëm të dëgjohen, por edhe të dinë se cilat janë rrugët konkrete për të adresuar kërkesat e tyre dhe për të ndjekur zgjidhjen e problematikave të ngritura.
Përmes “Zëri im, politika ime”, të rinjtë po fuqizohen për të identifikuar nevojat e komunitetit, për t’i artikuluar ato dhe për të dialoguar drejtpërdrejt me institucionet që kanë përgjegjësi për t’i adresuar.
Takimi në Cërrik ishte një tjetër hap drejt forcimit të këtij dialogu dhe krijimit të një kulture ku zëri i të rinjve bëhet pjesë e diskutimit dhe vendimmarrjes për të ardhmen e komunitetit.
