Në Prrenjas, projekti “Zëri im, politika ime” vijoi rrugëtimin e tij duke sjellë të rinjtë në një bashkëbisedim të drejtpërdrejtë me institucionin vendor. Takimi me nënkryetarin e Bashkisë Prrenjas, Aurel Karriqi, krijoi një hapësirë ku të rinjtë mundën të ndajnë shqetësimet e tyre, të propozojnë ide dhe të diskutojnë mbi mundësitë për përmirësimin e jetës së të rinjve në komunitet.
Gjatë takimit, të rinjtë ngritën disa prej nevojave që lidhen drejtpërdrejt me përditshmërinë e tyre, duke kërkuar më shumë hapësira sportive, ambiente rinore dhe mundësi për aktivitete kulturore, sociale dhe edukative.
Një vëmendje e veçantë iu kushtua nevojës për ambiente ku të rinjtë të mund të takohen, të zhvillojnë aftësitë dhe talentet e tyre dhe të marrin pjesë në aktivitete që i ndihmojnë të jenë më aktivë në komunitet.
Në diskutim u trajtuan edhe problematika që lidhen me aksesin e të rinjve nga njësitë administrative dhe zonat rurale, si dhe mundësitë për t’i përfshirë më shumë në aktivitetet dhe proceset vendimmarrëse të bashkisë.
Nënkryetari i Bashkisë Prrenjas, Aurel Karriqi, dëgjoi nga afër kërkesat e të rinjve dhe diskutoi me ta mbi çështjet që mund të adresohen në nivel vendor, si dhe mbi nevojën për bashkëpunim të vazhdueshëm mes të rinjve dhe institucioneve.
Takimi ishte një mundësi për të kuptuar se pjesëmarrja rinore nuk duhet të jetë vetëm simbolike. Të rinjtë kanë nevojë për kanale konkrete për të paraqitur kërkesat e tyre, për të ndjekur përgjigjet e institucioneve dhe për të parë nëse prioritetet e tyre reflektohen në politikat dhe investimet vendore.
Përmes “Zëri im, politika ime”, të rinjtë po fuqizohen me njohuri dhe mjete të advokimit, duke kaluar nga identifikimi i problematikave te propozimi dhe ndjekja e zgjidhjeve konkrete.
Në Prrenjas, ky dialog është një tjetër hap drejt një marrëdhënieje më të drejtpërdrejtë mes të rinjve dhe pushtetit vendor, ku zëri i tyre synon të kthehet në kërkesa konkrete dhe, më tej, në ndryshime që ndikojnë në jetën e komunitetit.
