Në Belsh, të rinjtë gjetën një hapësirë për të folur, për të ndarë shqetësimet e tyre dhe për të propozuar zgjidhje konkrete, në kuadër të projektit “Zëri im, politika ime”.
Në një bashkëbisedim të hapur me përfaqësues të pushtetit vendor, të rinjtë folën me qetësi, por me shumë sinqeritet, për nevojat që prekin përditshmërinë e tyre dhe mundësitë që komuniteti duhet t’u ofrojë.
Një prej kërkesave kryesore ishte krijimi i më shumë hapësirave sportive dhe terreneve të rregulluara, ku të rinjtë të mund të merren me aktivitete sportive dhe të kalojnë kohën e lirë në mënyrë të shëndetshme.
Po aq e rëndësishme ishte edhe kërkesa për një qendër rinore, një hapësirë ku të rinjtë të mund të mblidhen, të zhvillojnë aftësitë e tyre, të organizojnë aktivitete dhe të kenë mundësi për të bashkëpunuar me njëri-tjetrin.
Një tjetër shqetësim i ngritur gjatë takimit ishte transporti, veçanërisht për të rinjtë që jetojnë në fshatrat përreth Belshit. Vështirësitë e lëvizjes bëhen shpesh pengesë për pjesëmarrjen e tyre në aktivitete, trajnime, kurse dhe iniciativa të ndryshme që zhvillohen në qytet.
Përballë këtyre kërkesave, nënkryetarja e Bashkisë Belsh, Romina Mema, shprehu gatishmërinë për të shqyrtuar mundësi konkrete për adresimin e problematikave të ngritura nga të rinjtë.
Takimi ishte një tjetër shembull se pjesëmarrja e të rinjve në vendimmarrje nis pikërisht nga mundësia për t’u dëgjuar. Kur shqetësimet artikulohen drejtpërdrejt dhe institucionet janë të gatshme të dialogojnë, krijohet mundësia që kërkesat e të rinjve të kthehen në çështje konkrete për t’u adresuar.
“Zëri im, politika ime” synon pikërisht të forcojë këtë lidhje mes të rinjve dhe institucioneve vendore, duke i nxitur të rinjtë të jenë jo vetëm pjesëmarrës në komunitet, por edhe aktorë aktivë në përcaktimin e prioriteteve të tij.
Në Belsh, ky ishte një hap i vogël, por i rëndësishëm: një hap drejt një vendimmarrjeje ku zëri i të rinjve dëgjohet dhe nevojat e tyre marrin vëmendjen që meritojnë.
