Dhjetëra qytetarë u mblodhën këtë të diel në Shkodër për të protestuar kundër hapjes së Konsullatës së Serbisë në kryeqendrën e veriut.
Pjesëmarrësit shprehën kundërshtimin e tyre ndaj këtij vendimi përmes pankartave dhe thirrjeve gjatë tubimit, i cili u zhvillua pa incidente.
Organizatorët deklaruan se protesta lidhet me qëndrimet që, sipas tyre, Serbia ka mbajtur ndër vite ndaj Kosovës dhe shqiptarëve. Ata kërkuan rishqyrtimin e vendimit për hapjen e konsullatës në Shkodër, duke argumentuar se ai nuk përfaqëson interesat dhe ndjeshmëritë e komunitetit.
Tubimi u zhvillua në mënyrë paqësore, nën monitorimin e forcave të policisë, pa u raportuar incidente apo përplasje.
