“Ferri” mbi Tokë/ Flakët masive përpijnë Spanjën, 12 persona gjenden të djegur në makina (VIDEO)

SPANJË- Një zjarr masiv që shpërtheu të enjten pasdite pranë Almerias, Andaluzi, në Spanjën jugore vrau 12 persona. Sipas autoriteteve, disa nga viktimat u gjetën brenda makinave të tyre. Kryeministri spanjoll, Pedro Sanchez, shprehu trishtimin për këtë ngjarje tragjike dhe u bëri thirrje ekipeve të emergjencës të punojnë me kujdes maksimal gjatë operacionit.

Spanja po përballet prej vitesh me temperatura ekstreme, të cilat lidhen me ndryshimet klimatike. Temperaturat që shpesh kalojnë 40 gradë Celsius krijojnë kushte të favorshme për përhapjen e zjarreve. Sipas autoriteteve të Andaluzisë, zjarri shpërtheu në zonën e Los Gallardos. Fillimisht u raportuan gjashtë viktima në qytetin Bedar, por më vonë numri i të vdekurve u rrit në 12.

Rreth 150 zjarrfikës, të mbështetur nga pesë automjete, punuan gjatë gjithë natës për të vënë flakët nën kontroll. Në zonë pritet të angazhohet edhe UME, njësia speciale e ushtrisë spanjolle për menaxhimin e emergjencave. Për shkak të rrezikut, banorët e disa zonave u evakuuan. Një grua me djegie dhe një person tjetër u dërguan në spital. Katër persona të tjerë morën ndihmë mjekësore në vendngjarje për probleme me frymëmarrjen, ndërsa disa të tjerë pësuan djegie të lehta.

Rreth 50 banorë kaluan natën në një qendër kulturore të kthyer në strehim të përkohshëm, ndërsa disa rrugë u mbyllën për arsye sigurie. Shërbimet e emergjencës morën mbi 150 telefonata nga qytetarët. Sipas raportimeve të para, zjarri mund të jetë shkaktuar nga rënia e një kablloje pranë rrugës kombëtare N-340A, duke bërë që flakët të përhapeshin me shpejtësi në zonën pyjore.

Spanja po kalon një valë të re të nxehti dhe disa pjesë të Andaluzisë janë vendosur në nivel alarmi portokalli. Në fund të muajit maj, kryeministri Sanchez njoftoi se vendi do të angazhonte numrin më të madh të forcave për luftimin e zjarreve pyjore gjatë kësaj vere. Ditët e fundit janë regjistruar edhe disa zjarre të tjera në Spanjë. Njëri prej tyre dogji mbi 20 mijë hektarë tokë në Katalonjë, pranë zonës turistike të Costa Brava, por tashmë është vënë nën kontroll.