Mijëra besimtarë myslimanë falën sot namazin e Kurban Bajramit në bulevardin kryesor të qytetit dhe në sheshin “Gensher” në Elbasan.
Ceremonia fetare u zhvillua në një atmosferë paqeje dhe përkushtimi shpirtëror. Me këtë rast, besimtarët u përshëndetën nga Myftiu i Elbasanit, Agim Duka, si dhe nga imamë të tjerë, të cilët përcollën mesazhe solidariteti, harmonie dhe bashkëjetese mes njerëzve.
Në fjalën e tij, Myftiu Agim Duka theksoi se Kurban Bajrami është një festë që i fton besimtarët të largohen nga egoizmi, urrejtja, padrejtësia dhe indiferenca ndaj njëri-tjetrit, duke forcuar vlerat humane dhe shpirtërore në shoqëri.
Pas faljes së namazit, besimtarët shkëmbyen urime për festën, ndërsa shumë familje vijuan traditën e therjes së kurbanit dhe ndarjes së mishit me të afërmit dhe familjet në nevojë.
Kurban Bajrami simbolizon sakrificën, devotshmërinë dhe bamirësinë, duke përcjellë çdo vit mesazhe paqeje dhe humanizmi.
