Në një operacion të koduar “Destinacioni 4”, Policia e Tiranës ka finalizuar një tjetër goditje ndaj trafikimit të lëndëve narkotike përmes shërbimit postar. Si rezultat i hetimeve të zhvilluara në bashkëpunim me Forcën e Posaçme Operacionale të DVP Tiranë, Komisariatin e Policisë Rinas dhe Filialin Qendra Tranzite të Postës Shqiptare, u arrestua shtetasi R. S., 25 vjeç, banues në Tiranë, i dyshuar për trafikimin e lëndëve narkotike kanabis me përqindje të lartë THC nga Tajlanda në Shqipëri.
Gjatë operacionit, i cili është realizuar në kuadër të një hetimi proaktiv të drejtuar nga Prokuroria pranë Gjykatës së Shkallës së Parë të Juridiksionit të Përgjithshëm Tiranë, policia ka sekuestruar 2 kilogramë lëndë të dyshuar narkotike kanabis me përqindje të lartë THC, me vlerë rreth 40,000 euro. Po ashtu, janë sekuestruar edhe shuma parash, celularë dhe prova të tjera të vlefshme për hetimin.
Shtetasi R. S. u kap në flagrancë duke transportuar pako me lëndën narkotike që dyshohet se ishte dërguar nga Tajlanda përmes shërbimit postar. Hetimet vijojnë për të dokumentuar plotësisht këtë veprimtari kriminale dhe për të identifikuar dhe kapur individë të tjerë të përfshirë në këtë rrjet trafikimi.
Materialet janë kaluar për veprime të mëtejshme në Prokurorinë e Tiranës.
