TIRANË, 30 korrik 2026 – Ministrja e Arsimit dhe Sportit, Mirela Kumbaro, ka publikuar kalendarin zyrtar të provimeve të sesionit të dytë të Maturës Shtetërore 2026, duke u bërë thirrje maturantëve që të përgatiten me seriozitet për testimet e vjeshtës.
Në një mesazh të shpërndarë në rrjetet sociale, Kumbaro inkurajoi nxënësit që nuk arritën të përmbyllnin me sukses provimet në sesionin e qershorit të shfrytëzojnë këtë mundësi për të përfunduar detyrimet e tyre.
Sipas kalendarit të publikuar nga Ministria e Arsimit dhe Sportit, provimet do të zhvillohen sipas këtij programi:
- 24 gusht 2026 – Gjuhë e Huaj;
- 27 gusht 2026 – Gjuhë Shqipe dhe Letërsi;
- 31 gusht 2026 – Matematikë;
- 3 shtator 2026 – Provim me Zgjedhje.
“Është momenti të përgatiteni me përkushtim dhe të besoni te vetja juaj”, shprehet ministrja Kumbaro në mesazhin drejtuar maturantëve.
Sesioni i dytë i Maturës Shtetërore u ofron mundësi nxënësve që nuk kanë kaluar ose nuk kanë zhvilluar provimet gjatë sesionit të parë të plotësojnë detyrimet për përfundimin e arsimit të mesëm dhe të vijojnë procedurat për regjistrimin në arsimin e lartë.
